وش عاد باقي يا الليال المقابيل
وش عاد باقي غير حزن وتعاسه

طفولتي راحت بليا محاصيل
ما اعرف وش طعم الفرح والوناسه

عندي تساوت كفة الصبح والليل
دايم وانا نفسيتي في انتكاسه

إعاقتي صارت عليّه بهاذيل
محروم حتى من حقوق الدراسه

محجوز في غرفه عن القال والقيل
وفــ عيون ابوي اشوف عطف وشراسه

مثل السجين يكبل الباب تكبيل
لا جا ضيوف يشددون الحراسه

كبرت ما اعرف وش علوم الرياجيل
وباموت ثوبي ما اعرف وش مقاسه

لو يمنحوني فرصتي فقت هالجيل
حماس من ياسين تاخذ حماسه

ذكي واحلل في أدق التفاصيل
واعاقتي خلتني اكثر كياسه

مرات من زود العنا والغرابيل
تطيح دمعه رغم قلبي وباسه

ولا مرّ احد مسحّتها بالمناديل
عشان ما يلمح دموع التعاسه