//

///

لاصار منتب لضلع الطيب حادينـي
****خلّك على هفّتـك عسـاك ماتعـوّد
قلبي بحب الوفا والطيـب مشقينـي
****وفي صحبتك يالردي مانيب متجـوّد
الأصحاب في حزّة الشدات ترجينـي
****مانيب مثلك مع الأصحـاب متفـوّد
أنا الوفا والصفا صفحـة عناوينـي
****يومن غيري يخـب شـوي ويهـوّد
ولانيب في نظرتي لأصحابي دوينـي
****ولاني على لعبـة الحبليـن متعـوّد
وأمشي على منهجي في العسر والليني
****ورأيي براسي مانيب أتبع ولا أقـوّد
وقت اللوازم تراك قصيّـر إيمينـي
****تبرا لها مـن بعيـد تخيـل وتحـوّد
مبداك طين ٍ وترجع لأصلك الطينـي
****وفي داخل القبر يبلى الجسم ويـدوّد
وإن جا مجال ٍ بذكر الزين والشينـي
****وجه ٍ يبيّض لفعلـه وآخـر يسـوّد
أذلف عسى ماتشوفك يالردي عينـي
****مانيب في صحبتك يالـلاش متجـوّد

( شجاع )