وماالذكرى إلا ((غربه))..الغربه ..لشاعرالغربه

[صالح السناني]

اخوتي هنا وفي كل مكان .السلام عليكم ..لأني سأقضي جزءا من اجازتي في ( طيبه) وقد يفسر غياب مشاركاتي .. خلافا لذلك فقد حرّضتني الذكرى على كتابة هذا النص الأخير لي ..وماالذكرى إلا غربه,أو ليست هي غربة الحاضر بكل جدبه ؟ ... بكل متغيراته بدءاً من فصوله ..وحتى تفاصيله ! ولأنها دائما تحط رحالها هنا في القلب تبقى غريبة ...أحيانا عبث الفضول يحرضني لنبش ذكريات الغربه وفي أحد ادراج مكتبتي الخاصه تصفّحت كثيرا من رسائل الغربه بكل عبارات كاتبيها وذات رساله حوت أبيات شعر .. احتفظت بها سنينا ..أبت القريحه إلا أن تحاور مزيجا من مشاعر الغربه وإليكم ماجادت به متمنيا رضائكم دائما وأبدا ...


[poem=font="Simplified Arabic,6,white,bold,normal" bkcolor="blue" bkimage="" border="none,4," type=2 line=0 align=center use=ex num="0,black"]

( الغربة )


شفت القلم يبكي على صفحة كتاب=جيت امسح دموعه وفا وكتِبَتنِي
بدأ بقصة غربتي واسهب إسهاب=لين الحروف اللي كتبها بِكَتنِي
الغربه اللي كانت لحزني اسباب=وطّنتَها بالشِّعِر واستوطَنَتنِي
لين اصبَحَت حارس على كل الابواب=حتى وانا في موطني ضايقَتنِي
ماني بمستغرِب إذا الوقت ماطاب=مادامَها غصبٍ عليّ رافِقَتنِي
وشلون اباستغرب وانا همومي اسراب=لا حَلّقَت فينِي ولا فارقَتنِي
ولاني بمذهولٍ ولاني بمرتاب=أصبِر ولَو عن واقِعِي غَرّبَتنِي
صحيح من قال الزمن شبه دولاب=تَغَيّر ايامه ولا غَيّرَتنِي
أمضي وانا في داخلي قلب منصاب=أضحَك لو ظروف الزّمن حاصَرَتني
أشوف كل الناس من حولي احباب=حتى لو قلوب البشر غالطتني
تِجي عليّ ايام ماعِدّ الاصحاب=وكثير ما بَعض الوجيه انكَرَتني
تِغِيب عنّا وجيه .. ووجيه تِغتاب=وياماكثَر وجيهٍ نِسَت وِذكَرَتني
ياما ملَو جَوّي بتَصفيق الأِعجاب=وياما عِبَارات الرّضا داعَبَتني
ياما احتِفَت بي واغرِقَتنِي بالالقاب=وآنا آدري إنّي لامِشيت بهَتَتنِي
استانس وجيه الأعادي والاجناب=بالطّيِبَه اللي طول عمري سِبَتنِي
أوسّع الخاطر على بَعض الاقراب=اللي على بَعض العزوف اجبَرَتنِي
لو خاب ظنّي قلت ماظنّتي..خاب=يالنّيّه اللي دايماً لازِمَتنِي
أصمِت ولا ابيّن مشاريه وِعتاب=لَيه العِتَاب وشِيمِتي نَزّهَتنِي
قِلّ لَلحَسَافَه تَلبَس عتَابي ثياب=دام النوايا الصافيه ماانصفَتنِي
مهما الصّخا ..بكفوف جود الزمن شَاب=قَنَاعِتِي جادَت علَيّ واكرِمَتنِي
ومَهما الوفا كل اكثرَه بالبشَر غاب=يَبقى عَرِينِه بين مَتنِي.. ومَتنِي
كيف الزمن يَصدِق على لسان كَذّاب =وكيف النّوايا الصّادقَه كَذّبَتنِي
اللهٌ واكبر..وِش بقَى الوقت ماجاب=عَلّه يخَفّف من هموم اثقَلَتنِي
استَصغِر الدنيا ولااكون طلاّب=إلا لمِن هو خِيرِتِه سَيّرَتنِي
الله لايَجعَل على عيوني حجاب=عن حاجةٍ من طاعتِه قَرّبَتني
ولا يجعل الدنيا لها عِندي حساب=لو..هي على كرهي لها حاسبَتنِي
هذي هي الغربه وذا همّ الاغراب=اللي كثير الناس عنها سألَتنِي
الغربه اللي حارسَه كل الابواب=رَحَلت عَنها وشَرّقَت وِلحَقَتنِي[/poem]



صالح السناني (شاعرالغربه)