الوداعية


ترى الذبايح وأهلها ما تسليني
وأنا أدري إن المرض لا يمكن علاجه


أدري تبي راحتي لا يابعد عيني
حرام ما قصّرت ايديك في حاجه


اخذ وصاتي وأمانة لا تبكيني
لو كان لك خاطر ما ودي إزعاجه


أبيك في يديك تشهدني وتسقيني
وأمانتك لا تجي جسمي في ثلاجه


لف الكفن في ايديك وضف رجليني
ما غيرك أحد كشف حسناه واحراجه


ابيك بالخير تذكرني وتطريني
اجيرني خالقي من نار وهَّاجه


سامح على ما جرى بينك وبيني
أيام أمسي عدل وأيام منعاجه


عيالي همي وأنا اللي فيني يكفيني
علمهم الدين تفسيره ومنهاجه
***
رحم الله عابرة سبيل ورحم الله جميع أموات المسلمين


وهذه القصيدة لزوجها بعد وفاتها


حاولت أنام وحاربت عيني النوم
وجريت صوتٍ مثل صوت الذيابه


الجفن كنه صار ضايق ومهزوم
ودموع عيني مثل رش السحابه


على وليف قالوا اليوم مرحوم
فارق وراح وما هتنى في شبابه


زرت القبور اللي على بعضها ارسوم
وخطيت رسمي فوق ذيك النصابه


أحبها مير القدر صار مقسوم
ويحبها كل الأهل والقرابه


الموت أخذها واودع القلب مثلوم
جرح عميق ما يداوي صوابه


الموت أخذ شجعان وارخوم وقروم
وأخذ رسول الله وباقي الصحابه
***