[poem=font="Simplified Arabic,6,red,bold,normal" bkcolor="transparent" bkimage="http://www.alhejaz.net/vb/images/toolbox/backgrounds/16.gif" border="solid,4," type=0 line=0 align=center use=ex num="0,black"]
أيام مرت لها تذكار=فيها تعاسه وفيها سرور
من يعرف صقالة العيار=فيها نجلّب نجيب شعور
فالعاري ندوّر المحّار= فالجزر عنه المياه تغور
واحيان نلقى لنا حبّار= حِبره على اصابعه منثور
ولا الهواره تجيب بهار= والمحترف يرمي المجرور
والمِحيا دايم مع البحّار= تلقى اسفله فالبحر مغمور
هذي مخادج وهذا شوار= وكلاّ بما يحصّله مسرور
والمينا مفتوحه للزوار= من قبل يُبْنى عليها السور
والبنقله للمصلى جار= والدنقي بالساعيه مقطور
الناوري للثقل صبّار= راعيه في حالته ميسور
والبنط مرصوف بالأحجار= عاري له الساعيه ماتزور
فينبع وكالات للتجار= والأربعاء سوقها مشهور
تبغى حجر روح أبو منقار= والنوره والجبس فالتنور
البيت متعدد الأدوار= وصفّ الرواشين له ديكور
ينبع من اول عليها اسوار= والباب لجل الأمن مخفور
أبواب تُفتح مع الأسحار= وبالليل تُسدل عليها ستور
فالليل يتْجمّع السمّار=كلا حسب مايجيه الدَّوْر
الرادِيُو مصدر الأخبار= والشنطه فيها اسطوانه تدور
إستوطنوا ينبع الشعّار=بكسره يعبّر عن المستور
يُُوشِر لك المركب النجّار=وحدّاد فنان صِنْع دسور
صايغ ونحّاس جنب النار=جَلِي مع إِلْحام للمكسور
وسط الكتاتيب فيه إصرار=قرآن محفوظ أو منظور
إسبح وخلّك مع التيار= لاتسير في معاكسه مغرور
المبخره والفُرُن آثار=والشُّونه مبنى جنوب الصور
فالمملحه ملح بالقنطار=وحوتا مشرَّح وشيء منشور
هذا بعض مما كان وصار=وتلقاه وسط الكتب مذكور
وان كان قصّرت فالمعذار=واسمَعْك ياللي علي تشور
وصلوا على محمد المختار=إعداد مافالمدار يدور
واعداد ماقيلت الأذكار=واعداد مافالكتب مسطور[/poem]