[frame="9 80"]


شعر/ سالم بن عريج آل شافعه

الله يعينك يا المواطن على الصيف
الجو حامي والموارد كسيفه
منته من اللي ما يحسب المصاريف
أكبر همومه وين يقضي مصيفه
متحيّري ما بين باريس وجنيف
وإلا يوجه للديار المريفه
يقضي الاجازه في ديار على الكيف
الجو بارد والشوارع نظيفه
وإلا أنت خلك للشقا والتكاليف
حر وعجاج وكهرباكم ضعيفه
ما عاد ينفع حركم فيه تكييف
حتى المساء ما فيه نسمه لطيفه
إن جيت تبغي تخفف الهم تخفيف
ما به مكان يسلي النفس طيفه
إن جيت تبغي البر ما به مشاريف
هذي شبوك وذي مواقع قذيفه
وإلا البحر ما عاد يطرأ ولا شيف
من دون شوفه المباني المينفه
والمجلس اللي مدهل الجار والضيف
منصي الرجال أهل النفوس الشريفه
من عقب ما يدرج به العود والكيف
ويكرم به الرجال لا جاه ضيفه
حامت عليه من الحكومه جراريف
حتى تساوي بجلسه مع رصيفه
وأصبح عليه الحر وسود الصواديف
وأهل الجشع مخاشرينه رغيفه
مدري حسد مدري جشع يا الربع كيف
كيف المواطن ذي حياته كسيفه
هذي حقيقة جبتها بالتواصيف
اللي رضا بالوضع وإلا بكيفه

من بريدي [/frame]