[poem=font="Arial,5,undefined,bold,normal" bkcolor="" bkimage="images/toolbox/backgrounds/18.gif" border="none,4,#400000" type=0 line=0 align=center use=ex num="0,#400000"]
يارب مالي سواك آقف على بابه=
يامن بكايه أمامه مااا يعرّيني=
كم من سترته وهو ما تضفي ثيابه=
وكم من فضحته وهو رب الملاييني=
يارازق الطير ماله غير مخلابه=
يسرت رزقه وهو راع الجناحيني=
في هدته ما تعدد عنده اربابه=
له رب واحد ولو للناس عشريني=
الناس ياكثر من ترجيه وتهابه=
تظن به خير وإلا تدفع الشيني=
ما شفتهم عند منهو طال مرقابه=
رزت صورهم على خشوم المياديني=
وما شفتهم عند منهو تدمي حرابه=
تحمل الجور من ورع السلاطيني=
هذا زمانٍ يدوس الحر بركابه=
وإن كان له جم عدٍ يستوي طيني=
وإن فات حظه وهو ما بوّس ترابه=
عدى الطويله وقال الليل ممسيني=
فيه الجهل عم حتى روس شيّابه=
ويا كم به شايبٍ مثل الوراعيني=
ما عاد تفرق بداوينه وبنجابه=
كلٍ ليا عد جده قال أنا جهيني=
والمال مال لْهفايا ما بها ثابه=
تجمع حرامه وتربي مبطي الديني=
ما هم مزكين روس المال واذنابه=
يبون طلعٍ كما روس الشياطيني=
والمال سيلٍ تشوف الحضر بشعابه=
ويحرم قراحه على ِشعب البداويني=
يارب ناصيك ذل وقلّت أحزابه=
ماله من الناس لافزعه ولا معيني=
الليل به طال حتى الصبح له شابه=
ويش أنت ياصبح مثل الليل مضنيني=
يارب قلبي دعاك بليل محرابه=
لا تفتن النفس عقب الشيب في دِيني=
ضاقت على اللي لغير رضاك ما يابه=
وأنت الذي رحمتك لو شئت تنجيني=
يا قاضي الدين ديني حــّل طـــّلابه=
والدين عسرٍ عليّ وشيّب بعيني=
منه العباير على الخدين منسابه=
وادناة ما يعترض دربي يبكيني=
والدين عسرٍ على من فـــّتل اشنابه=
اللي لهم صولةٍ وسط الدواويني=
حرار جولٍ من الديّان هيــــــّابه=
لا شافوا المقتضي صاروا مساكيني=
وإن قلت ابصبر لذل الدين كذّابه=
ما شالن الدين من قبلي مزاييني=
مير الذي ما حسب للمقبل حْسابه=
نوّخ رْكـــــــابه وقال الموت تاليني=
لا لجت الريح بيتك جوّد اطنابه=
ولا تنزل إلا بقاعٍ بين ضلعيني=
ضلعٍ ليا من غشاك السيل ترقى به=
وضلعٍ ظـــلاله تنصّاها المحيليني=[/poem]