[poem=font="Simplified Arabic,4,red,bold,normal" bkcolor="transparent" bkimage="" border="none,4,gray" type=1 line=0 align=center use=ex num="0,black""]
يا ملكنا يا عضيد الحق والباطل ترده=شوف بنتك يوم طاحت بان ما تحت العبايه
لا أمين ولا وزير وكل منصب من يسده؟=دام ما فيها حسيب ولا رقيب ولا درايه
كل واحد لا تقدم في مناصبها تحده=نفسه الشينة على درب الرذيلة والغوايه
مستريحٍ من رصيده والمخدة تحت خده=مهتني والشعب فيها لا شقاك ولا شقايه
زينوا شاطي بحرها بين جزر وبين مده=دامها صارت عروسه واكتبوا فيها روايه
صار ظاهرها يسر الناظرين ومستعده=للمحافل كل وقت وبروزوها بالدعايه
لكن الخافي بلاوي والله انا ما نوده=نعرف الساس الضعيف يهد جدران البنايه
كلما تنهض جسدها مرها سيلٍ وهده=عيّفت سكانها فالخير وتْريد الحمايه
صابرة تحت المآسي والقهر والظلم مده=عذبوها دون ذنبٍ ترتكب والا جنايه
سالت دْموع القهر والصبر فيها زاد حده=فجرتها بالفضايح ما لواليها ولايه
لو بكن خواتها من حالها حزن وموده=خايفات يصيبهن ماصابها وتصير آيه
يا ملكنا تشتكيلك من رداة الحال جده=كل عام وكل سيل يمرها صارت حكايه
[/poem]


الشاعر عبدالعزيز الشاطري