قالوا علامك تسهر الليل ماتنام

قلت السهر من بعد الاحباب عاده

ياماسهرت الليل والناس نيام

وياما جفا راسي ليان الوساده

وياما قطعت من الخرايم بالاقدام

يومن بعض الناس وطى شداده

وياما لقفت وزرت ترفات الاقدام

يوم الهوى والغي للقلب زاده

واليوم شيبان تحت حكم الايام

تلعب بنا الدنيا على غير عاده

يابو علي طير الهوى بالسما حام

قطع مسابيقه ونوى بعاده

ماضنتي يرجع من الحوم ينضام

وعقب السعى يرجع لفتلت قياده

مافات فات وصافي الوقت مادام

ولا احداً يبدل بالسعاده قراده

لاشك يوم اذكر هوى ترفاً العام

احس في كبدي مرارة عناده

قفا وانا قفيت مانيب منلام

حيث ان مطلوبه صعيب مراده

يبي القمر خاتم على راس الابهام

ويبي النجوم تصف له في قلاده

ويبي السحاب لحاف والناس خدام

وامره على كل الجميع اعتماده

مغرور في زينه ويستاهل وسام

على البنات البيض زينه زياده

من مغرق القذله الى راس الابهام

مافيه شي ينتقد ياحماده



وسلامتكــــــــــــــم




مع تحياتي........ابو فهد