قصيدة الشاعر نواف جريبيع الجهني في مسابقة شاعر العرب

[أبو رامي]

عزمي ما يلين

[poem=font="Simplified Arabic,6,#000000,bold,normal" bkcolor="#C5F0E6" bkimage="" border="double,4,#2900FF" type=2 line=0 align=center use=ex num="0,#400000"]
يا الله ياربي عليك الاعتماد بكل حال = يسر على اللي ضيقته بالصدر كانيها سنين
مثلي وأنا اللي ما ارتخى عزمي لو حمولي ثقال = ما ابديت ما حسيت وإن غنيت ما باح الكنين
الفقر مر ومنه أمر إن كان دمع العين سال= ماهو عسى فالي ولا فال الوجيه الغانمين
لكن ظروفي ياحروفي تجبر اضرب به مثال =عن واقع ملموس أغير فيه جيم لكم سين
إن قيل بشر قلت : همي زال وأدري ويش زال = وأقول أنا ماني حزين وكل مامني حزين
جسمي برا مما جرى عفت الكرى والصبر طال = أصبر وأكابد وأحتمل وأقول ياربي تعين
يا ليل أنا صبري نفذ لا شك من ضرب الخيال = إني أغير منهجي وألا لك دموعي تبين
خذها حقيقه للزمان ولا تكثر بالجدال = إن لنت وألا لو قسيت أقسمت عزمي ما يلين
عزمي يشيل اللي يشيلونه صناديد الرجال = ماني بحاسب للزمان إن زان وألا لا يزين
أبوي وصاني ولاني ناسيا لي ويش قال = يومه يقول ليا نظرت انظر لرب العالمين
وليا سقيت الدلو وثق دلوك بخير الحبال = وليا هقيت اهقا تصل يمناك نجم الفرقدين
والمال لا يدخل عليك ريال من غير الحلال = وف المروة والخلق واظفر بهن دنيا ودين
ولا تترك المعروف لو بعباد تشذى للرمال = جاحد حقاق الوسم لو ثعله يشد الناظرين
للشك لا تترك لواحدهم على الخوة مجال = لو غرك بنظرات عينه راغ مثل أبا الحصين
صاحب عريب الجد جزل الرد محمود الخصال = ترى الفتى يعرف على ما قيل من عرف القرين
الصيت والنوماس يبغاله مكافح واحتمال = وإنت كما جدك( صبيح) وقول يا نواف آمين
خلك لربعك واصدقاك ومن لفا بيتك ظلال = وليا انتخوبك دونهم لا هنت يا الضلع المتين
فخرك وذخرك عزوتك وافهم تراهم راس مال = قدم لهم ما تستطيع ولا أنت مقصور اليدين
وأخذ الثلاثة خلهن نبراس لك طول الليال = الدين يا نواف ثم الدار بعد الوالدين
واعرف ترى الشكوى لغير الله ما منها نوال =إلا جراح الأصدقاء وأفراح ناس شامتين
الصبر مفتاح الفرج والله عليه الاتكال = وكِّل عليه الأمر وابشر بالفرج في كل حين [/poem]


نواف جريبيع الحبيشي الجهني
مسابقة شاعر العرب ـ قناة رواسي الكويتية

تردد نايل سات 11555 عمودي ـ تردد عرب سات 11977 عمودي