إيوا ياعمي .. خذوهم بالصوت مدري بالغشنة .. وقبل مايتعشابك افطربه .. ويادندرمه بالحليب ..
إنت ياعمنا قلت رايح عمره يعني مسألة يوم والا يومين بالكثير ورحت أخذتلك وراها جوش ماابغى اقولك قدايش ..
بس لجيت للحق أنا عاذرك ومايعرف النار الا واطيها .. إنت يابشير زي حالاتي تفضى يوم وتنشغل عشرة وعشان كذا مشاركاتي على قد الحال ومتى مازانت الحال .. يابويا مااحنا لاحقين فهادي الدنيا المدربكة ( على فكرة دربكة قريبة من دربكة ) وكله يرقص ويلنجح ناس على رجل وناس بلا رجل وحايسين زي عمنا هذاك وهو داخل مدينة ملاهي .. شي نفهمه وعشره فاتحين الفم متهولين ماطلعنا على كذا يارجل .. مانقول الا يارب تخارجنا وتعينا وتلطف بنا ياكريم ..
يابشير ..
ياعمي أنا ماأذنت فمالطه ..
كلامي من الواقع والمقاسات زابطه ..
واقولك بالواقع يابوالبشاير ..
فالسنوات الأخيرة الكل شايف ان عدد سكان ينبع ازداد بشكل كبير جدا وتجاوز المية ألف مدري المية وعشرين ( الله يحفظ ويبارك ) .. وصرنا ( يعني أهل ينبع ) زي الغربا فالبلد مانعرف اكثر اللي نشوفهم وفين لما تقابل ينبعاوي زي الفاكهة .. يارجل اذا ابغى احصي نسبة أهل البلد مع اللي جونا من كل محل بالكثير الكثير لايمتكن ولا حتى بالمخاوزة انهم يزيدوا عن الثلث ..
طبعا والثلثين من السكان كل واحد منهم يبغى يعيد فديرته مع ربعه ..
بس عاد شوف الهيئة الملكية اللي سكانها مايجوا نص سكان ينبع البحر رغم ان اللي يبقى فيها قول نص السكان لكنهم ينظموا احتفالات للعيد على أجمل مايمكن وبتكلفة لاتقارن بما تصرفه ينبع البحر ( اقول هذا الكلام وأنا مطلع وقريب من هذه التنظيمات ) والبركة فالأوادم اللي يحبهم قلبك فالهيئة وخصوصا عيال ينبع الأبرار على رأسهم دينمو احتفالات ( عيد معنا في ينبع ) الأستاذ خالد سبيه والأن ولد ينبع الخيٌر الأستاذ نبيل زارع وزملاهم الله يحفظهم ويوفقهم ..
المهم يابشير المسؤولين فالدواير الحكومية اللي من خارج ينبع ومن حق كل واحد يعيد عند ربعه لكن الهرجة على المسؤولين في الجهات التي تؤدى خدمات هامة للمواطنين طول السنة ولايمكن توقفها وخاصة اذا كانت أكثر الصلاحيات أو القرارات الهامة في يد أو لايمكن تتم الا بتواجد المسؤول الأول في الجهة ..
ماأدري ليه يابشير دايما تجي فبالي الكهربا وأقول الحمدلله ويارب تحفظ وتوفق ابن ينبع البار المهندس نهار بن صديق .. وهذا الرجل الكل يثني عليه وعلى تعاونه وتواجده في قلب الحدث وحرصه على الاستجابة الفورية لراحة المواطن ..
ويارب تعين وتوفق المسؤولين في الجهات التي تتصل خدماتها بالمواطن وبالأعياد .. ونشوف بإذنه تعالى أجمل احتفالات العيد في ينبع زي ماكانت زمان وأحسن لما كان الناس يجو ينبع من مكة وجدة والمدينة ومن كل محل يتفرجوا على العيد والأنس اللي مافيه زيه ..
هاذي هيا الهرجة يابشير بالتفصيل المفتشري .. وربك يابشير اني مااتخيل اني أعيد خارج ينبع .. لكني شايف العالم تفر هنا وهناك وكل واحد من يمه وشايف الخطورة اللي تهدد احياء احتفالات العيد ..
وخليك مكاني يابشير لما تشوف أعياد ينبع ايش يصير فيها وماعندك الاالحكير وماأدراك ماالحكير والغشنة اللي فالحكير والسندوتش اللي مايشبع الطير وسعره غير ..
البركة زي ماقلت فالعمدة وسمير لكن هل معقول الأطفال مايروحوا الا عند العمدة وسمير بس ويرجعوا ننومهم متنكدين ؟؟؟ .. ولاتنسى انهم يسمعوا عن العيد ويشوفوا في التلفزيون ويتحسروا مساكين ..
هذا اللي جبرني أفكر أخذهم بلد غير ينبع واخليهم يلحقوا عمرهم ويعيدوا زي اطفال المسلمين ..
بس لعلمك وسلامتك ..
وبعوده الأيام يازعيم .