[poem=font="Simplified Arabic,7,black,bold,normal" bkcolor="blue" bkimage="http://www.alhejaz.net/vb/images/toolbox/backgrounds/28.gif" border="solid,8,orange" type=0 line=0 align=center use=ex num="0,black"]
صلّينا جمعة بمسجدنا=مجموعنا قارب الخمسين
على الغدا الجار عازمنا=حاسب حسابه ذبح شاتين
لما سألناه جاوبنا = مطهر عيال بنتي اثنين
مجالس وساع كفتنا=من اللي صلوا حضر ثلثين
لبيتنا جات جارتنا=معها غريفه غطاها صحين
بعد العشا كلنا نمنا= قبل الفجر كلنا صاحين
نحل فالليل واجبنا=والصبح نحفظ لنا سطرين
أذّّن ورحنا وصلينا=مسجدنا وبيوتنا من طين
شلنا كتبنا وروحنا=المدرسه بعدها كيلوين
دبّاب صوته ينبهنا=استاذكم الزموا الجنبين
جانا مطر خير بلّلنا=فالمدرسه نقّطت فصلين
لما رجعنا تلقطنا=الكل منا ملا جيبين
من يوم جينا تغدينا = مصروفنا قرش أو قرشين
منشار ومغراب سنينا= في ساعه تحش لك حوضين
جريد وكرناف لمينا = ونعود للبيت مسرورين
وجهنا للعين واسقينا = والكل حافظ وجاب العين
حصيلة الزرع ودينا = للسوق صبيحة الاثنين
وان قالوا شركه تنادينا = سهم لهذا وذا سهمين
الفاغيه عطر بيدينا= والورد في المزرعه نوعين
لحدودنا ماتعدينا = باللي قسم ربنا راضين
لاجا فرح ماتوانينا=ذبّاحنا شاهر السكين
بسلخ الذبايح تبارينا=بطشّة الجلد متساوين
قدر على النار حطّينا=تذوّق وقال ملحه زين
بمشهاب عليه ضوّينا=اقشى عنه غشاوته هالحين
فالمعرى للرز غسّلنا=حكره مايتجاوز الصاعين
طباخنا لو غفل عنا=من المرق راح مغرافين
جبنا الحنابل وفرّشنا=برحه تكفّي لها سبعين
الزير والنار شغْلتنا=كُلاّ يحضّر معه عودين
ملح البواريد ريحتنا=علبة كباسين محتسين
قوم المضاخر قلايدنا= دبه وتطاريف مليانين
عريس بيشانته جينا=قرص الخَوَى ينقسم صحنين
فرحة تلاقي وعمّتنا=طول السنه يمكن جوازين
وليا سروا نلم حاجتنا=وشيّابنا قبلنا نايمين
الصبح نصحى بموعدنا=ماكن حصل شيء نشطانين
ماهي كما الآن حالتنا=لو نسهر نقوم تعبانين
ينبع قبل ماتناحينا= جنات تصعب على الناسين
واليوم في حال مشقينا=لازرتها تذرف العينين
يالله يارب تسقينا=من المبارك لخيف حسين
وترد لنا عيون تروينا=ويعود من أهلها الناحين
ويارب تسقي ضواحينا= حتى نرى معانق السيلين
يالله يارب تهدينا=تبعدنا عن سكة الغاوين
وصلّ على مبلّغ الدينا=وسلم عليه كل وقت وحين[/poem]