بعد ماصليت العشاء على طول ركبت سيارتي ورحت لسوبرماركت وكان في جنبة محل بروست ( مشهور في ينبع ) المهم لمحت صاحب قديم من القزاز حق محل البروست فقلت ياولد فرصة أدخل المحل وسلم على الرجال تراك زمان ماشفتة من يوم شافني الرجال قام وبالأحضان حتى وانا داخل للمحل شاهدت أثنين جالسين يشكلهم يستنون طلبهم وعلى مااظن أن أعمارهم فوق العشرين بقليل المهم يادوب أقول للرجال كيف الحال حتى دخل علينا مجموعة شباب تصدقون ماني مذكر عددهم اربعة او فريق كامل نسيت ، المهم مادخلو هالشباب إلا وبدت المعركة في المحل ضرب ومضروب ولكمات خطافية يمينية ويسارية وكراسي طايرة في الجو واخوكم يبي يطلع بس محكور في المحل ماني قادر حتى شفت عامل في المحل منبطح قلت في نفسي ياولد لايكون حكم ومستني يعد لعشرة او مستني إشارة إستسلام وبعدها تنتهى المباراة ونخلص ..
تصدقون الكراسي ألي في المحل كسروها وقوارير الشطه والكتشب الله سلم روسنا منها حتى تدخل بعض العمال من المحلات المجاورة وفضو النزاع وتم تحرير الرهائن وطبعاً اخوكم وصاحبة كانو من ضمنهم .. تصدقون كانت لحظات رعب عشناها في المحل لابارك الله فيهم والسبب ماني داري عنه يجوز واحد سقط على الثاني في الخط او أنه ثار بايت بينهم وجات الفرصة عشان يصفونة والحمد لله انهم ماصفونا معه .

إنتهت القصة وإنتهت فصولها ولكن من الواضح ان الموضوع لم ينتهي .. فهل فهمتموني؟ الله يستر .

الراوي ... حر اليدين