عقبال 100 عام

[دايم السعد]

عقبال 100 عام
ـــــــــــ

عقبال يا ما خذ فـؤادي ميـة عـام = ضيعتني منك وأنـا مـا اهتديتـك
لا ما نسيتك كيف با نساك مـا دام = ذكرى الفراق تهزني لـو نسيتـك
حبك قدر وأنا على ديـن الإسـلام = مكتوب في وجه الجبين ورضيتـك
لك في الضمير الود والحشمة أتوام = ولي في ضميرك مثل ما أنا بغيتـك
ولك منزلٍ في نايف القلـب وخيـام = وذود الغـلا ترعـاه ولا شكيـتـك
يفطر عليك القلب وان فارقك صـام = والله لونك شـوك سـدره كليتـك
القلب طيرٍ لا دعـي للهـوى حـام = وألا إنت وكره من كثـر ما هويتـك
كن العيون من النظر عقبـك أيتـام = وكني ما ريت إلا إنت من يوم ريتك
وكنك معي وأنا فقدتك مـن أعـوام = مـع الخيـال ألقـاك كنـي لقيتـك
من صعب وصلك ما تهنيتك أحـلام = وان جابتك فزيت شـوق ومحيتـك
يعني وصالك صعب وأهدافي أوهـام = يعنـي زرعتـك للقـدر ما جنيتـك
صبرك يقولون العرب كـل الأيـام = يوم عليـك ويـوم لاجـاك جيتـك
ويا قلب ياللي ورثك جـروح وآلام = بليتنـي ما هـو بانـا اللـي بليتـك
ولعتني من عادني في الهوى خـام = وأسرفت بي وأنا خطامـك عطيتـك
طعتك وزبدة طاعتـك هـم وهيـام = ما الله كتب لي واستخرت وعصيتـك
لو للقلـوب أسـواق بايـع وسـوام = لا أبدلـك وان جيتنـي ما شريـتـك
وإلا إنت يا للي جيش عينيك مقـدام = لا أقنعت منـك والرجـا ما رجيتـك
كني سجين بين إفـراج وإعـدام = وكنك سجن وأنـا بنفسـي بنيتـك
تنبيك عن حالي محاصيـل الألهـام = وتخبرك نظراتـي نهـار التقيتـك
عقب الوصال اللي على عين من لام = قد هو يكفيني عن الوصـل صيتـك
وقدني إلى مريت بالشـارع العـام = لديت من ما في الضميـر ودعيتـك
ادري إن صوتي ما قطع عشرة أقدام = وادري بي أعود إلى مـن نصيتـك
يا شينهـا يا محنـيٍ راس الإبـهـام = ما قدر على شوفك وأنا عنـد بيتـك

[المعلم]

شكرا دايم السعد
قصيدة جميلة
جزاك الله خيرا