قصيده عن الدعوه

الدعوه



الدعوه اللي تبعث الهم في الناس
هم الرسول وهم كل الصحابه

هي دعوة المختار هي و الله السا س
واللي سلكها منهج الحق صابه

ترتيبها ما هو بحبر بقرطاس
ولا هو بقول ينطقه من حكى به


ولا هي بلبسه يلبسه كل من قاس
ريع رفيع يا هني من رقى به

غيث القلوب يطهر ادران و انجاس
قول الله اللي نزله في كتابه

املاه جبريل على خيرة الناس
صفوة هل التوحيد سيد الصحابه

قاسي من اجله للشدايد مع الناس
رغب و رهب في النعيم و عذابه

يا ويش عذ ر اللي تلطخ بالدناس
يوم القيامة اذا وقف وش جوابه

أبنصح اللي خاطره دوم محتاس
جرب مزامير وجرب ربابه

هذا طريق أوله فيه لفلاس
دينه مع دنياه ضيع شبابه

اسلك طريق الدين والدين نوماس
المنهج اللي صفوة الناس جابه

تكفون يا لخوان عضوا بالضراس
على طريق يفلح اللي مشا به

امر عجيب تجتمع عدة اجناس
سر غريب سر ما حد درا به

نعمه ورحمه لا قنوط ولا ياس
سر الهدايه سر ما حد هقابه

في مجلس ما يحضره كل بلاس
وبليس من فضل الولي ما درا به

يا هل الصفات اللي غزوا دار الاجراس
تجولوا كنهم نمور بغابه

جولاتهم ما بين لندن وتكساس
وما بين لاهور ودلهي وطابه

مشوا عل الاقدام والرب حراس
تزودوا من لي عظيم ثوابه

لا يبتغون بجهدهم جمع للماس
دنيا ولو زانت تعود خرابه

يا زين جمعانا ويا عز مجلاس
لا من جلسنا مع حياة الصحابه

ما هي مجالس للنميمه ولفلاس
مجالس فيها اللغط و السبابه

مجالس أهل الخير تبني على ساس
فرق عظيم بينها الا تشابه

اضرب على فرقاهم اخماس واسداس
نور بقلبي من سببهم لجابه

والصدر مرتاح ولا فيه هوجاس
والهم راح وصار عقبه طرابه

والختم صلوا على خيرة الناس
اعداد ما هل المطر من سحابه