معاناة طفل

قصيدة للشاعر / عبدالكريم بن علي المزروعي الحربي

عنوان القصيدة : معاناة طفل

اليوم جانـي طفـل فالبيـت يشكـي
يشكي علي أبـوه و أمـه و يبكـي
وقلـت لـه بالله يـا طفـل تحكـي
وقال أنـا زابنـك وشاكـي شكيّـه

مسحت دمعـه و قلـت يالله تحييـك
ابشر بخير أبوك ذا الحيـن ياجيـك
وقال لـي يـا شايـب الله يعافيـك
من صبح كلٍ راح لـه فـي نحيـه

الكـل منهـم مستلمـلـه وظيـفـه
ولا يلبسـون الا ثـيـاب نظيـفـه
وهمـا يقولـون الرواتـب ضعيفـه
عشريـن راتبهـم وقـالـوا بلـيـه

ومن العمل العصر فالبيـت ياجـون
وبعد العصر كـل الثنينـه ينامـون
ومن نومهم المغرب اللـي يقومـون
وقالـوا نبـى البـراد والشاذلـيـه

وبعد العشاء نـادوا علـى خادمتهـم
قالوا لهـا ويـن الطفـل و تركتهـم
يبغـون منهـا علـم مـا علمتـهـم
قالت لهم ما اعرف كلامـي شويـه

دقوا على الجيـران قالـوا مانـدري
والكل منهـم راح فالحـي يجـري
قالـوا ولدنـا راح والليـل غـدري
وهمـا بلاويهـم بــلاوي قـويـه

دقـوا عليّـا البـاب أبـوه و أمـه
قلت الطفل موجـود بالإسـم سمـه
ونـاداه يـا شيهـان ولــد يـمـه
وقـال أنـا ادورك وانـت هنـيـه

قلت امرقوا فالبيـت والعلـم بعديـن
الله يحييكـم علـى المذهـب الزيـن
الطفـل هـذا مشتكيكـم يالاثنـيـن
و لاهو برايـح قبـل حـل القضيـه

قالـوا مـا يمكـن يشتكينـا ولدنـا
أللـي سعدنابـه و ربـي سعـدنـا
حنـا الثنيـن اللـي عليـه إجتهدنـا
واليـوم قـدم لـه عليـنـا دعـيـه

وقلت يا شيهان تشكـي مـن اهلـك
أبوك و أمك سهـروا الليـل لجلـك
وقـال لـي بالله تـهـرج بعقـلـك
أنا أشتكي لو كان ما أخطـوا عليـه

أبوي و أمي أحرمونـي الرضاعـي
وبـدال در أمـي حليـب صناعـي
ما ادري من الجمجوم ولاّ المراعـي
في المرضعـه ترضعنـي الأجنبيـه

الله حكـم للطفـل رضـاع حوليـن
واليوم مااحد يرضع الطفـل يوميـن
ما يضيع حق الطفل ما بين الاثنيـن
والله حكم لـي حـق والحـق ليـه

وقلت لـه عنـدك دعـاوي بعدهـا
قال عندي عشر محصـي عددهـا
ولا يجـوز لـلأم تتـرك ولـدهـا
وابوي وافقهـا علـى التـرك ليـه

قلت إسمعوا دعواه و ابغـى إجابـه
تغلـق الطـلاب و تـصـك بـابـه
هـرجٍ بـلا تغليـق مـا فيـه ثابـه
مثـل المصيّـح فالديـار الخلـيـه

قالوا ولدنا يشتكـي مـن الرضاعـه
وما عندنا على الرضـاع استطاعـه
فالبيت خادم ترضعـه كـل ساعـه
وتقـوم بالواجـب ولاهـي رديــة

وشيهـان مقصـوده نبطـل عملنـا
وهـو أملـنـا لا يخـيـب أملـنـا
والخادمه أحرص على الطفـل منـا
ذا الحين كل النـاس سـووا كذيـه

قال الطفـل أبغـى حنـان ورعايـه
ذا حـق ليّـا آنـا وللـي كمـايـه
والأجنبيـه مـا تـعـرف العنـايـه
ولا تعلمـون اللـي تسويـه فـيـه

ما تلد يمي يوم أنـا اقـوم واطيـح
لو صحت مهما صحت ما كني آصيح
تقفـل البيبـان و معهـا المفاتـيـح
ولاروّح الراعـي تضيـع الرعيـه

تسمّعـوا ياللـي تربـون الأطفـال
لا تهملون الطفل ما يجوز الأهمـال
هذه نصيحة لكـل مـرأه و رجـال
التربيـه واجـب عليـهـم سـويـه

تسمّعـوا ياللـي تربـون الأطفـال
لا تهملون الطفل ما يجوز الأهمـال
هذه نصيحة لكـل مـرأه و رجـال
التربيـه واجـب عليـهـم سـويـه
صح لسانه
وشكرا لك نسيم الليل

كلام حكيم


وفيه عبرة


تقبل تحياتي