نكبات للجميع

في سوق الاسهم قالوا تجيك صفقات
تربح وتصبح فوق عرش التجاره
خذْ لك مع التجّار صولة وجولات
يمكن مع المقسوم تبني عماره
شفت العروض وشفت كثْر المبيعات
والمشكل اني من هواة الإثاره
طمرْت في سوق \"المواشي\" بلحظات
بْشار الشوير اللي بليّا مهاره
واخذْت لي صفقة على كيف ماجات
صفْقة قوية ذقت فيها الخساره
قمت اترنّح مثل شرّابة القات
ولاّ كما اللي ناطحه قرْن ثاره
قالوا تحمّل وانت راع المهمّات
لا تنهزم لن كان تبغى الصدراه
الجولة الاولى تراها بروفات
وانته صدفْت السوق وقت انهياره
قلت المواشي طالقة خمس مرات
حلفت ما طبيت سوق الجزاره
وشفت الكهارب في بلدنا منيفات
وانوارها في كل شارع وحاره
فيها عروض المشترى بالالآفات
والناس جاي إلهم عليها اعتكاره
واخذت لي في \"الكهربه\" خمس لسعات
فيها تجرعت الالم والمراره
وقلت \"الزراعي\" يمكن ابرك بحالات
لعلّي اجني منه حالي ثماره
واشوفها تفتح وتقفل بنسْبات
والربح منها ينهمر وبغزاره
ساعة دخولي صابت السوق نكبات
حتى المؤشر قال جاكم شراره
خرجت وانا ادعي عليها باالآفآت
تلْحا الورق وتهل غض البكاره
قمت اتجول في قطاع \"الصناعات\"
أساس تدعيم الوطن وإزدهاره
أكيد مافي هالصناعة خسارات
(مهارة) و (خبره) و(مجلس إداره)
وأول بدايه طحت في \"صدق\" طيحات
\"وفالكيميائيه\" إنكسرت انكساره
\"وسيسْكو\" و\"فيبكو\" كل ابوها مطبات
ولاّ اللجين اللي كواني بناره
و\"الغاز والتصنيع\" جاني بغازات
ما عاد اميّز ليلها من نهاره
قال \"السمنت\" وقلت ماابغى سمنتات
الكيس ب 14 وقت اشتهاره
ماريد يالصاحب سوى \"الاتصالات\"
لعلي احظى بالشرف والاماره
أبراجها ترسل من الجو شارات
وتقرّب اللي مبعدات دياره
خرجت منها فاقد العقل والذات
حتى بجوالي فقدت الحراره
وأمّا \"البنوك\" إبها قطعت العلاقات
مالي بها قنصل ولا لي سفاره
بنك \"الجزيرة\" ماذكر فيه فودات
و\"الراجحي\" مالي عليه إقتداره
واسمع علوم الناس فيها مريبات
كلّن على كيفه يصدر قراره
تركتها مالي ومال المتاهات
هيْ بالحلال وما كسبنا غراره
رحت اتشكوى عند قوم الملامات
قالوا تشطر والتجاره شطاره
السوق مثل البحر ظلمه ولجّات
والحوت لامن جاع ياكل صغاره
كنت احسب إن المشكله فالقطاعات
واثر المشاكل من سباع المغاره
اللي لهم بالسوق فنّ ومهارات
والسهم لامن زاد وطّوعياره
يمارسون القرصنه والغوايات
ويمثلون اسم الشرف والطهاره
واحنا غدينا للهوامير صيدات
نبي الهروب وشددوا فالخفاره
لامن شرينا صار بالسوق نكبات
ولْيا نوينا البيع زاد انحداره
راح الحصيل وراحت علومنا افوات
واللي سلم منّا طريح الجباره
حصدت من سوق التداول ريالات
إبها اختم المشهد واصك الستاره