دخيل الحب

دخيل الحب ****كلمات الشاعر عبدالرحمن الحوتان


دخيل الحب من نظره دخيل عيونك الحلوين
ترى قبلك كثـــير وما خــبرت إني توسلته

نعم جيت أعترفلك والغلا بعيوني الثنـــــتين
كثر ما شالتك عيني صويبك طاح ما شلته

أجيلك ظامي كلي عطش في قلبي المسكيـن
وأرد بخافـــــق كله حزن يومك تجاهلـــته

أبيك أتحس في قلب ٍ تعذب في هواك سنين
واحلف انه عذابي منك ما يوم ٍ تخيـــــلته

أشوفك تشرق الدنيا محبه بين عين وعـين
كلامي واستحيت إني أقول ورحت ما قلته

على كثر الذي شفته غلاكم ما نزل للحيــن
أنا من يملك عيوني ترا ما يومها خذلـــته