صوتك يغنى1000ريال +خروف نجدى

في ديرتنا انواع العقليات والمفاهيم!!

والعقليات هاذي منها المتخلف ومنها المتطور ومنها اللي يدربيها,,,وهلم ركض

وطبعا بعد الاعلان عن انتخابات المجلس البلدي اختلفت ردود الافعال من شخص لاخر,,

ومن خلال جولتنا السريعه نلاحظ وجود منخض جوي على راس ابو قميص مما يؤدي الى انخفاض مستـ...<<مابقى الا تقول مع احلى الاماني مع حسن كراني خخخخخخخ

نرجع لموضوعنا,,

أثناء جولتي السريعه التي استخلصت منها نتائجي اللي راح اذكرها بالنهايه قابلت بعض من العينات التي تمثل جزء من المجتمع المنشكح على الانكماش اللاجتماعي<<ولاحد يسأل وش معناها

راح اتكلم لكم عن بعض العينات:




البيت الاول

بيت ابو ابراهيم واللي كان ولدهم ابراهيم من المؤيدين لفكرة الانتخابات وكان يبي يترشح,,بس ابو ابراهيم الله يهداه رفض الفكره نهائيا,,

وحارب وندد بطريقته يوم سمع انه ولده ابراهيم يبي يترشح وجاء عند أبوي يشكي ويدعي على من اخترع فكرة الانتخابات في مجلس البلديةلانهم بيشغلون ولده في البلدية وبيصير من حقين النظافه وبيقعدون يعيرونه جماعته,,بينما ابوي يفهمه انه مهوب البلديه حقين الزباله-تكرمون- هذولا المجلس البلدي,,<<يعني الحين فهم!!؟

لكن الله يصلحه من العجله ياخذ طرف السالفه,,

وصل ولده للبيت واستقبله بكاسة الشاهي تلاها دلة ثم اخيرا حضر بابريق الشاهي على جبهة ابراهيم مما جعل الولد يكنسل فكرة الانتخابات نهائيا,,مو لانه خاف من ابوه ولكن لانه في غيبوبة الى الان وماصحى والدكتور يقول ان احتمال بقاء ذاكرته كما هي مثل احتمال ان ابوه يرضى بفكرة الترشح للمجلس البلدي
^
^
يعني انسىىىىىى




البيت الثاني

بيت مصطفى حسونه وكان هو المثقف الوحيد في حارتهم لانه كان الوحيد اللي يلبس نظارات

بس جعله مايسولف عليك,,راح لحقين الانتخابات يبي يسجل اسمه مع الناخبين ومسكهم وقام يهذر فوقهم الين ماابترمت روسهموطردوه وسجلوا اسمه في البلاك ليست




البيت الثالث

بيت عيسى حمد موظف بادارة التعليم كل همه في الحياه نظافة الكابرس ورضا أبو علي رئيسه في العمل,,

ولو يقول له ابو علي صل العصر خمس ركعات يصليها ست ركعات عشان مايزعل!!

سمع ان علي ولد ابو علي رشح نفسه للمجلس البلدي وعلى طول راح سجل صوته وجاب بطاقة الناخب وسلمها لابو علي مع طلب اجازه يومين عشان يودي زوجته لاهلها
^
^
مايخدم بخيل




البيت الرابع

بيت ابو سليمان,,ولدهم سليمان متزوج وعنده بنت وولد,,خلص الجامعه وقدم على كل الوزارات والتخصصات والشركات والمؤسسات وحتى سكيورتي في مستشفى رفضوا يوظفونه لانه تخرج بتقدير مقبول,,!!

ويوم سمعوا عن الانتخابات رشحوا ولدهم سليمان,,عل وعسى يلقى لوووه وظيفة تعيشوووه هو وعييلوووه
^
^
على حد تعبير جدته هيله

وبالمصادفة تم اختيار خاله كرئيس لهيئة تسجيل الناخبين في احد المدارس<<يوم الله قرده

وصار ابو سليمان كل يوم مسنتر عند خال سليمان بالمدرسه وكل ماجاء واحد يسجل صوته مع الناخبين خذاه على جنب وقعد يقرق عليه يبيه يصوت لسليمان وان المستقبل بيدين سليمان وان ولده سليمان هو الكل بالكل,,,

ومن هنا ام سليمان كل شوي داقه على اخوها: تكفى ياخيي ساعد وليدي سليمان غديه يفوز ويسترزق من هالوظيفيه!!

ويوم فهمهم ان السالفه ماهي بيده زعلوا عليه وحلفوا انهم ماعاد يكلمونه لانه مايبي يوظف ولدهم!!

والا الان مالقوا احد يصوت لسليمان غير اخوانه اثنين وابوهم يعني انطر ياسليمان الين يجيك الربيع




البيت الخامس

بيت صنهات ال منسدح على بطنه,,وصنهات هذا سواق عند واحد من الامراء,,وعند جماعته وربعه انه خوي خاص للامير والامير مايرتاح الين يشوف خشته وعشان كذا دايم يدقون عليه عشان يجي مع الامير قبل يزعل الامير لان خويه صنهات ماجاء وبكذا مالها داعي الطلعه<<ومنا عشان يسوق بالامير

وطبعا عند ربعه وجماعته انه هو الكل في الكل,,لانه احيانا ياخذ معاريض من جماعته ويعطيهم الامير والامير مايقصر معه كعادة ال سعود في كرمهم دائما
^
^
ياالله تجيب لي امير مطنوخ يرسل لي رساله خاصه يطلب فيها رقم حسابي خخخخخخخخخخ

المهم صنهات رجل يحب المظاهر ويحب الترزز في كل مكان ويوم سمع بالانتخابات في المجلس البلدي رشح نفسه فورا ودون تردد لان السالفه فيها مجلس وعلوم رجال,,

وطق له ثلاث خيام كبيره من اقرب مكتب تأجير وحط قدامهم كم زوليه وكم شريط لمبات وجاب له كم طير مريض والا معوق وحطهم قدام الخيمه وكل يوم عشر ذبايح غداء وعشره على العشاء ودلة رايحه ودله جايه وهات يامهايط يبي العالم يصوتون له,,

وشوي شوي صارت خيمتين وبعدين خيمة الى ان صارت الحين بيت شعر مخيط من اكياس شعير ومافيه الا قهوه وبارده بعد تبيها والا توكل على الله وصوتك الله يغنينا عنه,,

وكنسل صنهات فكرة الترشح قبل بداية الانتخابات لانه تذكر انه مايعرف يقرا ولايكتب حتى اسمه!!

يعني بلااااش احرجات




البيت السادس

بيت حزام بن منجطل يحمل شهادة السادس ليلي عسكري في الحرس الوطني سمع ان ولد اميرهم رشح نفسه وراح يبي يصوت له,,

قال له ولده اللي بالمتوسط انه قرا بالجريده ان العسكري مايقدر يصوت ولايرشح نفسه,,

رد ابوه بكل ثقه: وانت يالرخمه تصدق كلام الجرايد!!

وراح وسجل اسمه وماقال لهم انه عسكري على باله انه بيضحك عليهموابئى ئابلني لو احد سمع صوتك!!!




البيت السابع

بيت ابو صالح,,وابو صالح يواجه مشاكل مع جاره صنهات لان عيال صنهات يكسرون لمبات بيت ابو صالح بالنباطه والحصى,,ودايم وهو ووصنهات مناقر وهوشات بسبة البزران,,

ويوم سمع ان جاره صنهات مترشح للمجلس البلدي راح وسجل صوته عشان يصوت لأي واحد منافس لصنهات
^
^
يعني بس لعااانه




البيت الثامن

شقة ثلاثه عزاب طفارى,,,سمعوا بالانتخابات وان فيه تاجر مرشح نفسه ويشتري الصوت بخمس الاف على طول طاروا لاقرب مركز تسجيل وسجلوا اصواتهم ورشحوا التاجر ومازالوا بانتظار الخمس الاف!!

وراعي الشقه يبي الايجار والبقالة تطلبهم والمغسله,,يعني مقفله من جميع الجهات وعلى امل الخمس الاف!!
^
^
ردد ياليل مااطولك!!؟




البيت التاسع

بيت يحيى هطيفي مدرس رياضيات يلبس جاكيت في جميع فصول السنه,,

وموسوس ويكلم نفسه ويشك حتى في نفسه ومعقد لدرجه تصعب فكها مع جميع الشفرات,,

سمع بالانتخابات وراح سجل صوته وتأثر باللوحات اللي يقراها وصوت لمن يستحق وماادري كيف,,والى الان وهو متوسد ورقة الناخب وماهو مصوت لاحد لان مافيه احد يستحق التصويت<<أجل وشوله تسجل صوتك ياابو هطيفي!!؟




البيت العاشر

بيت صلفيق سواق التاكسي,,

مكالمة تليفون في بيت صلفيق,,

صلفيق: هلللووو

الطرف الثاني: صبحك بالخير ابو صعفق انا مناحي ولد عمك منقاش

ابو صعفق: صباح الورد والياسمين<<كثر منها خخخخخخ

مناحي: انا برشح نفسي للانتخابات بالمجلس البلدي وابيك تروح تسجل نفسك ناخب ببطاقة الاحوال وبعطيك ارض اذا فزت

ابو صعفق: تم ياابو منقاش بس جهز الصك
^
^
انطرني خخخخخخ

راح يبي يسجل اسمه مع الناخبين ويوم وصل عند موظفين الانتخابات يبي يسجل صوته عطى الموظف ثلاث بطاقات مدنية وكلها له,,ويبي يرشح ولده عمه فيها<<عشان ياخذ ثلاث اراضي

سأله موظف الانتخابات وليه مطلع ثلاث بطاقات!!؟

قال يابعدي وحده للفوج ووحده للتكس ووحده للتقاعد!!

ومن هنا على الحجز ومنها على مكافحة التزوير ومازال صلفيق مختفي الى الان!!؟





ومن هالعينات طلعت بنتيجه وحده الا وهي,,ان البقاء للاقوى!!

منقول