مرثية الشاعر علي بن دغيش اليامي في شريكة حياته ( يرحمها الله )
مرثية الشاعر علي بن دغيش اليامي في شريكة حياته ( يرحمها الله )
يالله ياللي علينا باسطن نوره .................... ياغافر الذنب ياعلام الاحوالي
النفس عالصبر يارحمان ماجوره .................. وانا اتصبر وصبري بارين حالي
ياعين لو تذرفين الدمع معذوره .................. خليه ياعين فوق الخد همالي
ابكي على سيرة بالخير مذكوره ................ الصاحب اللي جبينه كنه هلالي
راحت وقلبي بعدها كنه الكوره ................. يلعب به الهم والهاجوس طوالي
راحت وروحي لها ياناس ماسوره ............... ماسورتن في محبة سمح الاقبالي
قالو تجوز من الخفرات غندوره .................. تغانم الوقت دام الفي مامالي
والناس ماتدري ان النفس ممروره ................ والنفس ماحبت الاواحدن غالي
ماتدري انها لابو راكان دكتوره ............... وهي البساتين وهي المشرب الحالي
الناس ناموا وانا اطالع في الصوره ............. راحت لكن زولها ماراح من بالي
يالله اباأشكي عليك النفس مكسوره .......... واللي كسر خاطري همي وغربالي
يارب روحي بعد فرقاه مخطوره ................ جرحي عميق وقلبي صابه هبالي
من اولن سالين والحال مستوره .................. اطرب معا من طرب واجر موالي
واليوم شابت قوافي الشعر وبحوره ............ يوم المقادير حطت فالها فالي
بنت اللذي في المراجل ماخذن دوره ........... عمي ابن سرار راعي المرقب العالي
يحريبها يوم هي سله وباكوره ................... نعمن بعمي عريب الجد والخالي
علوم عمي توارث كنها اسطوره ................. نعمن بابو ناصر اللي يمنع التالي
ان شار عمي فأنا بمشي على شوره ......... باطيع من منزله للضيف مدهالي
النفس يارب منهيه وماموره ......................... تامر على الكل وانت المالك العالي
ارحم غزالٍ في النسيم مقبوره .................... وامنحني الصبر وانت الحاكم الوالي
منقول
