[poem=font="Simplified Arabic,5,red,bold,normal" bkcolor="transparent" bkimage="" border="none,4,gray" type=1 line=0 align=center use=ex num="0,black""]
يا هاجسي لو المنايا لها وْسوم=هاك العلوم وردّها بحيد غمزه
لا عنترة والنابغة وابن كلثوم=وْلا خالد وجعفر ومصعب وحمزه
الشعر ماهو شعر .. والسيف مثلوم=يبقى لنا اسْم السيف والشعر رمزه
الهزل في صدر الجزالات مردوم=والذل فوق العز يومي بعجزه
لكن عندي فصل والجزل مختوم=والسيف له حدين والرمح غرزه
تعجّمت أفواه وعيونها توم=حتى ولو شافت مع القوم .. خنزه
والناس ضاعت فيه والوقت منجوم=واللي سرى بالكنز من مثل حرزه
نجس يتخفّى والليالي له هْدوم=واليا اصْبح اطهر من مصلاك وانْزه
معروف لكن مانْتجرّى على اللوم=تبقى القناعة كنز .. والكنز كنزه
والله يالباطل ولو يرفعه قوم=لا بدّ ما ينزل على الارض رجزه
والحق يبقى لو تجي دونه غيوم=لا بدّ ما يظهر مع الوقت فرزه
يا هاجسي غض النظر مانْت ملزوم=لو بان بعض العلم من حيد غمزه
يا شين حالك دايم ابكم ومظلوم=واو العنا من حولها سين همزه
[/poem]
