بين مشجعي الأهلي والإتحاد
ـــــــــــــــ
هذي محاورة (( كسرات )) دارت بين الروابغة
من مُشجعي الأهلي ومُشجعي الإتحاد .
أترككم مع متعة المحاورة الرياضية على طريقة أهل رابغ .
مُشجعي الأهلي
البارحه صفـق الجمهـور = وإستبشرت نـاس فرحانـه
واللي تحدى طلع مقهور = ومن بعدها كثرت أحزانـه
مُشجعي الاتحاد
البـارحـة غـــرّد العـصفور = والـحظ قـد فـك بيبانه
والا انت في أخر الطابور = محجوز لك عندهم خانه
مُشجعي الأهلي
جمهورنا بالفرح مسرور = أصبـح يغنـي لحـن دانــه
ما هو كما للي كما التنور = مــن خذلـتـه فاح نيـرانه
مُشجعي الإتحاد
يا عارفين الصقور صقور = كم شال مثلك بجنحانه
وأيـامـنــا والـسـنـيـن تــدور = والـخـيل معروف مـيدانه
مُشجعي الأهلي
تاريخ بـفعالنا مذكـور = ما ضاع فالوقـت عـنـوانه
أعوام راحت وجات عصور = والـطـيـر منتوف جنحـانه
مُشجعي الإتحاد
يا للي ذكرت الـفرح معـذور = تـسعه وعشرين عـطشانه
خلك على الطابق المستـور = من خوف تحزن على شانه
مُشجعي الأهلي
بلغ سلامي على منصـور = ولا يـزيـد ويعـد حلفانه
كم راح قبله على الدكتور = يشكي من الغلب وألوانه
مُشجعي الإتحاد
مثـلـك ولـيـف القـهـر مـعـذور = مـن فـرحـته شـقّ خلقانه
وبمـنـهـج الـعـرف والـدستور = ذنب الضعيّف على اخوانه
مُشجعي الأهلي
عشت الفرح والليالي نور = وارتاح قـلبي وشـريانه
وراع الزعل دايما مخبـور = ما حيـلته غــير بلسانه
مُشجعي الإتحاد
انـتم وصلـتوا لـنا بـالجـور = ومن بـيـننا ناس فـتانه
أحذر من النمر يا مغرور = مادمت في حاجة إحسانه
مُشجعي الأهلي
بين العرب علمنا مقرور = والـفـوز قـد بان ربانه
ومنهو يهني لنا مشكور = من جود طيبه وسيسانه
مُشجعي الإتحاد
كـلاتـنـا بـالـلعـب مـشهـور = وللمنتخب ساس عمدانه
مـبـروك ومغلـفه بـزهـور = مـهـداه مـن عـند جـيرانه
وسلامتكم .
