المساعد الشخصي الرقمي

مشاهدة النسخة كاملة : قلدوك وشاح يالحازم عسى ربي عوينك


سعد الهلــــولي
21-09-2003, 01:19 PM
الى الأخ الحازم مع التحيه

قلدوك وشاح يالحازم عسى ربي عوينك = والله اللي عالم(ن) يالحازم بصح الأسامي
ما نقول الا عساهم صادقين ومنصفينك = والمصيبه كانها جت رمية(ن) من غير رامي
ضمن السناني
21-09-2003, 02:33 PM
أبو مسعود

الله 000الله

طاروق من أوله ساخن

وين الحازم ترى ماسك صفه ولايهون ابو مسعود

والليل لايسري ياسنايدي

وين الحازم وين:D
ابو نايف
21-09-2003, 03:50 PM
بعد التحية والآحترام للجميع أبو مسعود والحازم

طاروق حامي من اوله , الله الله يا ابو مسعود وتراي ماسك صفك وشد الحيل

وينك يالحازم
الحازم
21-09-2003, 07:47 PM
خلووووووووووووووها


ياولد مسعود تعرفنا وحنّا عارفينك = لو تلف الكون ماتلقى بعير بلا سنامي

ياسعد خضنا البحر من قبل ماتبرق يمينك = والحقيقه ماجهلها لاشريف ولاحرامي
سعد الهلــــولي
21-09-2003, 09:55 PM
خلووووووووووووووووها


مانشك بذمتك والسجده تنور جبينك = لو زمنا يختلف ما بين بردوبين حامي
علمونا عنك سبع شهور راحت محترينك = والبخت جابك ونور الصبح جلاي الظلامي
الحازم
21-09-2003, 10:40 PM
ياعميلي طاعة الرحمن هي ديني ودينك = لاتبدّلها وتتركها تموت فقير ضامي

لو نحسب الوقت بالأيام مانلقى سنينك = لكن اصبر لين يأتيك الفرج من موج طامي
سعد الهلــــولي
22-09-2003, 05:00 PM
بارك الله فيك جعل الوقت ما يظهر كنينك = والله أعلم في نوايا كل من صلى وصامي
لو تحسب الوقت بالأيام حظي شوف عينك = عايم السبع البحور وملزم الكل احترامي
الحازم
22-09-2003, 08:58 PM
من مشى الدرب السوي مذكور والله لايهينك = والنوايا فالقلوب الصادقه ماهي كلامي

يالسنافي لاتوسّقنا الفيافي من رطينك = المراجل ماتجي بالغصب من دون إلتزامي
سعد الهلــــولي
23-09-2003, 12:28 PM
جعل ما غشوك يالحازم رجال مفهمينك = ما كسبنا الطايله بالسهل وحلوم المنامي
مير انا بنشدك علمني وغيري ناشدينك = ليه متلحف لحاف من الخفاء وأنت نظامي
الحازم
23-09-2003, 07:02 PM
مانصيت الا رجالٍ بالمواقف ذاكرينك = مثل صقرٍ حرٍ أشهر لايباع ولايسامي

ياصحيب الخير جاك العلم والداين يدينك = مانريد الشهره اللي تجعل العامين عامي
سعد الهلــــولي
24-09-2003, 12:31 PM
اشهد انك تشتري وتبيع والغالي ثمينك = فرح الله فيك قلب العود جعله للرحامي
افتخر واظهر ما دام ان الرجال مكبرينك = والخفاء خله نصيب اللي ضرب عامي بشامي
الحازم
24-09-2003, 04:30 PM
لانزلت السوق حدّد هامتك من ساعدينك = واعرف ان الرجل لو يقضي لزومه مايلامي

ياسعد لاتحسد العربان ماهم حاسدينك = أنت وانا مانعادل قطره فبحر الزلامي
أبو سفيان
24-09-2003, 05:48 PM
اعلموا أننا متابعينكم لحظة بلحظة ومتمتعين بهذه المحاورة الجميلة بين الحازم والهلولي مع حفظ الألقاب 00
والبارحة كنتُ عند أبو رامي في المجلس وكنا نسترجع المحاورة من أولها ومعنا الحاضرون بالمجلس وهي بلا شك تدل على مقدرة شعرية لدى المتحاوريْن العزيزيْن 000وننتظر كسر اللحن من الأخ الحازمي 00 أليس كذلك 0؟؟
سعد الهلــــولي
28-09-2003, 12:38 PM
ربنا معطيك عرف يرد كيد مخالفينك = لكن اشوف الهقوه اللي معك ماهي دفع أمامي
كان هبت مداحم الوراد ماهم راحمينك = لا تجي مثل الجفول مطرفه سد الضوامي
سعد الهلــــولي
28-09-2003, 12:39 PM
ابو سفيان مرورك ومرور الأخوه شرفنا
تقبل تقديرنا لشخصك الكريم
الحازم
28-09-2003, 08:04 PM
اخوي ابو سفيان

مشكور اخوي على المتابعه والتشجيع

وعسى ان نكون عند حسن الظن

والله يديم عليك الصحه والعافيه

وتقبل تحياتي وتقديري
الحازم
28-09-2003, 08:08 PM
كلها من عند ربي وانت ربعك سامعينك = يوم قلت ان الهقاوي ماتجي وقت العسامي

كان شفت الشارد ابشر بس اقول الله يعينك = لو يقابلك الفتى الضرغام ضيّعت الأسامي
سعد الهلــــولي
29-09-2003, 01:43 PM
شاعرنا المميز الحازم سعدنا بالتحاور معك ويبدو أن القاف شيب
الموعد في قاف اخر أن شاء الله