أخوكم بشير ورطااااان

[بشير]

كل عام والجميع بخير
تكفون يا أهلي أهل ينبع أخوكم بشير نازل ينبع فعطلة عيد الأضحى وحقين المدينة جيراننا ومعارفنا يجو تقريبا 18 عائلة كلهم يبغوا يعيدوا فينبع وقالوا ياعم بشير انصب لنا صيوانين كبيرة على البحر عشان نحنا سمعنا ان كل أهل ينبع يتمتعوا بالإجازة على شاطيء البحر المشكله جاري الله يهديه اقترح عليهم ان كل عائلة تدفع باي عشان المصاريف 2000 ريال وي قامت قيامتهم وهاتك ياردح نحنا ماننا جوعانين نحنا ضيوف على بشير بعدين نحنا اساسا معزومين وانا والله ما عزمتهم بس هما سمعوا ونحنا هاول شربناه شاهي كمانا ونحنا ونحنا لمن خلوني أعيش فدوامة قلتلهم رحوا الحج أحسن وأرخص قالوا زحمة
أسئلتي هي
أهم شي الكهربا انحلت مشكلتها ولا أكلم مزلس الأمن
لان رقم الزلس البلدي مو معايا
صحيح أن البلدية قشعت الاسفلت حق شارع الكرنيش والدنيا ملخبطة وما نبغى نظلمهم لأني سمعت بعض الناس يقولوا يقولوا هاذي عادة من البلدية فكل إجازة لازم تقشع
طيب الموية كيف نأجر وايت بس نخاف ينصرق
وصحيح إن أسعار الحوت نار لأن اللي معايا يأكلوا الزلط
طيب كيف أسعار الخواريف

[الشاهين]

طيب انت فينك يابشير لاتقول مشغول بالموسم والحج معاد فيه شغل زي أول الكبار ماخلو لاهل المدينة الي مثل حالي وحالك شغل يلقطون منه رزقهم شدو العماير جنب الحرم وماتشوف لاحاج ولازاير يخرج من بين العماير .
لكن تبغى الصحيح تستاهل تتأخر وتتشرط يعم انا من اول القعده سمعت انه مافيه مكان لصندقه ماهو لخيمه على البحر لكن ندعي معك ان الله يسهل الامور .
ياراجل لك وحشه يعني عشان نحبك تتعزز علينا .لكن كمان نحبك والله يابشير.

[فرح ينبع]

الله يكون بلعون

[حضاب]

يابشير سوينا كافة انواع النداءات والالتماسات لاكبر المسئولين لكن للاسف انا شفت العكس فرق البلدية جالسين يدركوا علب الكهرباء باقفزة حتى لا احد يشبك منها بس يقولوا انه الامم المتحدة سوت حل للتخيييم بينبع تعتمد على اغنية محمد عبده وهج الشموس ورايحين يوزعوا على مخيمات اللاجئين اجهزة لتوليد الكهرباء من وهج الشموس
اسال الله ان يفرج كربتك يابشير ويفرق ضيوفك حتى لا ينسفون جيوبك

[المعلم]

مااكلته الحويا يظهر على جلدها نبر
أخي بشير
فرحتنا بتواجدك وقرب رجوعك إلينا في ينبع
نساني أقول لك جيب معك أتاريك وفتايل وقزاز
ترى هي اللي ماشية اليوم في المخيمات
تحيتي لك

[الحالم]

صحيح أن البلدية قشعت الاسفلت حق شارع الكرنيش والدنيا ملخبطة وما نبغى نظلمهم لأني سمعت بعض الناس يقولوا يقولوا هاذي عادة من البلدية فكل إجازة لازم تقشع

والله انك صادق يابشير ... هذه عادت البلدية ...التقشيع والترقيع وقت الاجازة والتنزه لانعلم مالسبب ..؟؟

يمكن على شان يداروا اهمالهم فى الكرنيش والتغطية عليه

[بدر عاشور]

الله يكون في عونك اخوي

[الشاهين]

والله ماتدرون كيف اتعبني البحث عن موضع ورطت بشير قلت في نفسي خليني اشقر على الحبيب بشير وش سوى .
دخلت وكل ما ابحث في المواضيع يصادفني موضوع واقول ياولد عقب او اكتب خلصنا من بعض الردود وواصلت البحث ...(طبعا في هذا القسم ) وفي الطريق واجد بعض المواضيع التي لامكان لها بالقسم (وما أكثرها ) قلت تدري شيلك كم موضوع وحطه في مكانه الصحيح (قدر المستطاع ) وفعلا بذلنا الجهد نقلنا اثنان او ثلاثه (صحيح الواحد مقصر لكن العذر والسموحه ) المهم اخيرا وجدنا بشير وموضوعه .
لكن مايحز في النفس ان ابو البشائر شكله محصله شغله في الموسم بالمدينه ونسي لايطل على حبايبه في المزالس , لكن تدري يابشير وانا أخوك الشغل زين والله يرزقك كمان ياحبيبي يقولو الموسم رزقه كبير وخير من الله في مكه ومنى وعرفات واصل وقضي موسم الحج والعيد هناك .
تدوخ نفسك وتجي تعيد فينبع وفيها حصلت خيمه او محصلت ويمكن يمدو لك سلك كهرباء ويمكن مايمدو .روح ياحبيبي خلص اشغالك وفمحرم بعد متخلص الموسم الثاني فالمدينة تعال ...........أش رايك يابشير ....
ياراجل الناس استعدت لك وقالو بس بشير يجي ونعمله صيوان ماهو خيمه حتى ابو ياسر الله يخليه شاد حيله بالموضوع لدرجة انه ماهو قادر يرد على التلفون عشان ابغى اعرف اش سوى لك من كثر ماهو يجري بين البلدية والشرم وعمله كمان الرجال عنده عمل ومانبغى نقطع عيشه .
المهم اني بريت ذمتي وعلمتك والناس كلهم شهدين .

[WALD LZEZ]

الله يعينك ويساعدك
وبلون لله تتسهل


تقبل تحياتي

[أبو ياسر]

جرة رجل من الشاهين لموضوع بشير
ولايهمك يابو البشاير ريح نفسك من المخيمات ونحنا مستعدين لخدمتك حول لنا مبلغ عشرين الف ريال نستاجرلك في فالشاليهات طالما إنك كريم وعازم جيرانك بيت الناطوري وبيت المانوغجي .
وبعدين العشاء اليومي ماهو غالي إحسب حساب النفر بـ ( 100 ) ريال يعني لو حسبناها يابو البشاير على أساس إنت وضيوفك ( 25 ) شخص وكل يوم وجبتين غذاء وعشاء يصير تكاليف اليوم الواحد ( 5000 ) ريال وخلال أربعة أيام يعني ( 20000 ) ريال ويبغالك مصاريف نثرية ( 10000 ) ريال
يعني الإجمالي خمسين ألف ريال لمدة اربعة ليالي في ينبع
يابلاش ومنها تتجمل مع ضيوفك بدلا من شندلة الكورنيش
ولاتتعب حالك وتعزمنا ترى نجيك أنا والشاهين ومحب الموروث والبندر ونتعشى عندك ونتغذى ومعانا العود والقانون ونلعبلك طرب ينبعاوي ( سلموا ياسالم )
يابشير الله يسعدك اعلم ان المصاريف فالمخيمات لاتقل عن مصاريف الشاليهات لكن تمون عندي صيوان كبير على البحر يفداك انت وضيوفك لكن مااضمن لك الكهرباء
خليك مبسوط يالشاهين واتمنى محب الموروث ياخذ زامه مع ورطة بشير

[ملك الساحة]

بشير انت لحد الان ما تعرف ان ينبع من كبريات المدن الصناعية فى العالم وتسال عن الحوت والزرنباق والحوت الناشف والبصر يا اخى عيد فى باب مكة احسن ولا تعال واطلع على معالم النهظة الصناعية ولا خليك فى بيتك احسن
ينبع ملت من الاستهزاء والاستخفاف لماذا لا نعطى فكرة حضارية عن ينبع بلاشى حوت وبلاشى بصر وبلاشى حوت ناشف الله يهدى الجميع ويصبر ينبع اين الوفاء ؟؟؟؟؟؟؟؟؟؟؟؟؟؟؟؟؟؟؟؟؟؟؟

[المستطلع]

الحمد لله ما فكرت في يوم انصب خيمة على البحر لان كلام الناس مقنع الخدمات ماراح تجي


على العموم عليك بيمة برية واضاءة قمرية وهواء عليل وشبة نار ودلال ومعاميل

دمتم من العائدين

[!!عــــذاري !!]

الله يعينك ويساعدك

[محب الموروث]

انا دخلت على هذا الموضوع قبل كذا وقلت ياولد أفرك لأني لو أبغى أقول اللي فقلبي أخليها فضاااااايح .. لكن ايش أسوي .. كله من الشاهين اللي ماأقدر أرفض له طلب ارسل لي رساله بالجوال ويقوللي لازم تشارك في موضوع بشير عن المخيمات والعيد ..
ياعمي خيمة ايش فالشرم والا الكرنيش اللي لاصقه فبعضها ؟؟ .. يعني اذا أحد رفع صوته تسكته علشان الجيران وكمان البزززر مايقدر يخرج من الخيمة !! ..
ويادوبك تكفيك حزمة بواكير .. هاذي لعيالنا .. أما الضيوف الله يعينك تقعد تدحلس فالبزززخ والا تاخذه ملاهي بعيد عن الخيمة وتسيب أبوه يتفرشخ فالخيمة وتعطيله الريموت ..
ياعمي عليك وعلى الحنو والا الحسي .. روقه ..
ولو تبغى تلعب رديح هناك تلعب وتاخذ راحتك .. بس ماتقدر تلعب طيري .. أصلها اللي هناك جلفين اذا مااندسيت فواحد يطبوا فيك فالتاني ..
ومادام المصاريف خمسين ألف زي ماحسبها أبوياسر هزها كمان شويه وسوي خيمه هناك وجيب ماطور يجملك وسوي عقد لمبات زي حق الزواز واستأجر سيارة برادة وعبيها عصيرات وببسيهات وخواريف وسمك تازه ( انتبه .. لاتحط فيها السمك الميت من زمان .. تراه راح يخرب ابو الثلاجة ) .. ويستحسن تستأجر سيارة ثانية تخليها بقالة ( بالبلش طبعا ) وتعبيها معلبات وغير معلبات وطرشيهات وصحون بلاستك وصفر وملاعق ومناديل وحفايظ وصابونهات وشامبوهات .. وهات .. هات ياحبيبي هات ..
احسبها انت .. انا مالي شغل ..
بس أبغى أسألك .. انت متعشي والا تنام خفيف أحسلك ؟؟ ..
وانت متى جيت ؟؟ .. ومتى مسافر ؟؟ ..
طيب ياحبيبي .. نشوفك ..
عن اذنك مع السلامة ..
خلينا نشوفك .
.

[عاشق كيمو]

FF1493]سلام عليكم اخوكم عاشق كيمو جديد يسلموووووو[/font]

[بشير]

شكرا الشاهين العزيز

ياعمي ايت شغل وايت موسم الحمد لله مستوره الله على زمان كنا فالمواسم نلقى خير قبل ما يلهطوها الهواميط حتى البركة أعوذ بالله راحت

المهم اخوك ورط وانتوا تقولوا مافي مكان ولا كهربا ولا نظافة والكرنيش انقشع جاتني فكرة يمكن أخيم على بعد الرايس ولا فمستوره وأريح دماغي



شكرا فرح ينبع
وفقك الله

[بشير]

شكرا حضاب
في اوروبا والدول المتغدمة البلدية تنصب لك مخيم متكامل وكمان الأكل عليهم يوم مشويات ويوم مقليات واخر يوم مفرطحات

شكرا المعلم الفاضل
فناويس واتاريك ول ليه مو باقي الا لنبه تنك
يابو خالد الله لا يحيجنا لهم لقد اعيانا هراءهم وهرطقتهم وسوء كيلهم وتخطيطهم وعنادهم
إلى الله المشتكى

[بشير]

شكرا الحالم
سلم الله فمك كل بعد فتره يقشعوا الله يستر عليهم

شكرا بدر عاشور
عندك خيمه وماطور سلف حتى لو حقت الدفاع المدني

شكرا مره تانيه الشاهين العزيز
خلاص فضحتنا وانت ماسك فبشير حصل شغل فالموسم ياعمي هوه ونيت غمارتين نكد عليه مكه المدينه حتى البيت اللى حيلتنا هدوه فجبل عمر والبيت التاني اللي فقربان طاح والبيت اللى فعنيكش طقعوا عنو الكهربا قال ايش قال مؤجرين عمالة متخلفين يعنى احنا لقينا عمالة بريطانية عشان نأجرهم


شكرا ولد لزيز
وفقك الله


شكرا أبو ياسر
ياعمي الله يحييكم كلكم بس هيه تنحل ونلقى مخيم وكهربا وبعدين نخليها فل ولو عندي عشرين الف نجيب العود والقنون والمرواس و اسكن ففندق الديمران ونخليها ليلة فوق السطح ونقدع على الضيوف اللى تحت وعلى حقين البلديه عشانهم ما يقدروا على القنافد مدري الفنادق الكبيره

[بشير]

ملك الساحه
اذا كنت داري فتلك نصيبتن
واذا كنت جاهلن فالنصيبة اسمن

وان كنت من ينبع اقول لك
وظلم ذوي القربى أشد مضاضة
على المرء من وقع الحسام المنهد

الله يهديك يعنى هذا اللي قدرت عليه حبيبي نتكلم عن تاريخ وحضارة بلد والحوت والبصر والصرنباق نعمة من نعم الله وياما سد جوع انسان وفتح بيوت ناس وكان وما زال مصدر رزق شريف ومن ينتمى لينبع جدورا وأصالة لا يستعرررر من تراثها وتاريخها وعاداتها وتقاليدها وانني أفتخر بأنني ينبعاوي حر

نعم ينبع من كبريات المدن الصناعية وهذي حقيقه يقرها الواقع وانا اول من يدعوا الله ويتمنى لها ولأهلها المزيد من التقدم والإزدهار ولكن لا مستقبل بدون جذور ليبقى شامخا وثابتا

حبيبي ينبع وأهلها انظلموا كثيرا ممن لم يتحملوا الأمانة بل وخانوها ومدينة ينبع الصناعية لم يستفد منها الا القليل بل ولم تجد ينبع الام ببحرها ونخلها سوى التجاهل والمحاربة والاستهزاء منهم وما زالوا بل فرقوا في الوظائف والخدمات وحتى في العناية الصحية

نكتب ونناشد ونصررررخ لتعم الفائدة لعلهم يفهمون ويفيقون ولمصالحنا يعملون
يطول الحديث واللبيب بالإشارة يفهم
سلاما

[ناظم]

والله يابشير انك خطير
لو يعرفو ان كيلو الصرنباق صار بمية وعشرين ريال يعني اغلى من كيلو السمن
لكن ماتقول الا خير
ابسط ياعم السنة الجاية هناك فلل تقيمها البلدية للمواطنين ومجانية على البحر

[بشير]

شكرا المستطلع
وفقك الله


شكرا عذاري
وفقك الله

[البحار]

والله انك صادق يابشير لا وكمان جاتك المطبات الجديدة زادت الطين بلة

[بشير]

شكرا أخويا محب الموروث
ياعمي انت والشاهين وابو عباس مسويين عليا روباطيه زبطيه ايش خمسين الف وايش عشرين الف ياد رح انا لو عندي فلوس كان رحت الحج ولا اخدتهم الغرقده اغرقهم هناك وانبسط واخليها غردقانه
على فكرة ارسلت لكم مع الشاهين ونيت نعناع ودوش وعطره وورد بليز قسموها على كل المخيمات فالليل عشان وهما قاعدين فالظلمة يزبطوا البرررراد المنعنش ويدعوا على الظلمه


شكرا عاشق كيمو
الله يوفقك


شكرا ناظم
قللهم هذولا اللي مايعرف يقرأ يعبر
ياعمي الله يغنيننا عن البلدية بلا فلل بلا قلل تلقى تكلفة الفله بمتين الف يسووها بعشرين الف وتطيح بعد شهر الله يوفقك

شكرا البحار
يطبطبوا ويقشعوا ويحفروا ويدفنوا
لا ويقولك في خطوة جريئة مسعود والنظافة
وفقك الله