فين التقي لي محامي زين/ مع التحيه

[أحمد عطا]

مع التحيه=
فين التقي لي محامي زين=يدرى العواقب ويتقنها
أبغى اشوف الحقيقه فين=لجل الدعاوي مانضمنها
لان قلبي غرق فى عين=من الظما ماعلم عنها
لقيوه فيها بعد يومين=ميت بعد ما شرب منها

[قادم من بعيد]

العم/ احمد

جميل هذا الطرح

اسجل اعجابي

تحيتي لك

[ريبال]

الشاعر الكبير العم احمد عطا
ارجو ان تتقبل مني هذا المردود ليس مجاراه لك فالعين ما تعلى على الحاجب ولكن وجدتها فرصه لأستفيد من هذه المدرسه تقبل تحياتي


يامرحبا والعرب صفين=والفايز اللي يورّدها
شفت الحقيقه لها وجهين=بانت لنا في مضامنها
وان كان تقبل عليك الفين=دعوى تجي في مواطنها
ويصير نقض الحكم بعدين=لجلك محكحك معادنها

[المعلم]

الخال أحمد عطا
حياك الله أبا تاج
مشتاقين لهذه المشاركات الجميله والرصينه
الأخ ريبال ماقصر
ولكني أحببت المداخله معكم وآمل قبول مداخلتي


يامرحبا شاعر الجيلين= لاحت فرص هاذي أثمنها
مالي في سلك القضا تعيين= لو ان دربي من أيمنها
يلزم ثبوت القضيه اثنين= شهودها بعد مااعلنها
وان اتضح للمطالب دين= القاضي يسدد الإنها

[أبو حسن]

العم شاعر الأجيال / أحمد عطا

أنا متواجد في متصفحك الراقي لأسجل أعجابي الشديد بهذه الرائعة من ضمن روائعك

[أبو عماد]

أشوف في بحرها شطّين =لا ظلّها الليل زاينها
السبت ولا على الإثنين =جلسات الأحكام نعلنها
والعين في ظلمها لا وين = لا وين نحمل ضغاينها
وخصومها ما تعدّى إثنين =القلب واللي يعاينها

[البندر]

والله سويتلك ردين=لجل المعاني نثمنها
واختار واحد من الاثنين=واياتهم قول احسنها
البندوري=
زمان والناس مشتاقين=للى الوفا من معادنها
واعلم ترى الكل ممنونين=لااقوالكم من محاسنها
والان ياشاعر الجيلين=اللى فالامثال معلنها
يبغالها من رجال الدين=قاضى فالاحكام يوزنها
البندوري=

[خليل]

لو للهوى حكم ومحامين = تصدر قرارات تضمنها
ماشفت بين البشر باكين = وقلوب تشكي ضغاينها
يبقى الهوى ولف بين اثنين = تحيا بولفه بواطنها
وان مات ماله قصاص ودين = يلملم رفاته لمدفنها
مع تحياتي =

[صالح محسن الجهني]

مع التحيه=
فين التقي لي محامي زين=يدرى العواقب ويتقنها
أبغى اشوف الحقيقه فين=لجل الدعاوي مانضمنها
لان قلبي غرق فى عين=من الظما ماعلم عنها
لقيوه فيها بعد يومين=ميت بعد ما شرب منها

الشاعر الكبير العم أحمد عطا
تحية طيبة
تصفحت المنتدى في هذا اليوم ووجدت هذه الرائعة لكم وكما هو أنت دائما شاعرا رائعا وعملاقا بارعا لهذا الفن الأصيل واستاذا نفخر ونعتز به .
أبارك لكم تخرج أبنكم سائلا المولى عز وجل له ولكم التوفيق والسداد وأن يمتعكم بالصحة والعافية واسمحوا لي بهذا الرد المتواضع الذي لا يرتقي لجمال نظمكم للشعر خيالا وواقعا ومعاني جميلة تستحق الإعجاب .

ابشر هلا يا هلا واهلين=ياللي حروفك نثمنها
كل المحامين زين وشين=عينٍ ما تعجبك تدفنها
للميسرة نصف لك صفين=وتعدادها نصف بايمنها
لأن تاجك على عرشين=للقيل بديار ساكنها
ضميان مثلك ولي دلوين=كل دلو ضاع بمفاتنها
وتعيش للقاصي والادنين=تشرب ونشرب محاسنها
أبو محسن=
تقبلوا فائق التحية والتقدير

[الرا مــــي]

شوف المحامي وصلك الحين=لجل القضيه مثمنها
وعندي بهذا الأمر كورسين=منها أترافع وأدونها
تبينت لي خيوط اثنين=راع الهواء ما يوازنها
القلب واضح غرق من لين=والعين في سم لونها
مصيرالأسباب بكره تبين=ويبان حتى مكونها
إنعش قليبك ولو بالصين=يا ستاذ ربك يزينها

[محب الموروث]

وهذا الرد من الشاعر الأستاذ فيصل فران مع أطيب تحياته وتقديره للشاعر القدير أحمد عطا ..

يقول فيصل فران ..

يامن لكم عندنا تثمين = وخافي المعاني يثمنها
قلبك ترى صابته سهمين = رمايها صاب وأحسنها
وضحيته قلبك المسكين = ضامي شرب ماتمعنها
من فين تبغى قصاص لمين = واللي على الأرض باطنها

مع أطيب التحيات .
.

[أحمد عطا]

الاخوة الأفاضل

قادم من بعيد
ريبال
المعلم
أبوحسن
أبوعماد
البندر
خليل
صالح محسن
الرامي
فيصل فران

السلام عليكم ورحمة الله وبركاته ..
أشكركم على حسن تجاوبكم ومراديدكم الكريمة لاعدمت هذا التواصل ..
ولكم خالص تحياتي .