شعر لحامد زيد

[ودعت جرحك]

حبيت اشارك بقصيدة
لحامد زيد وهي غرام واحباب

على ذاك الطريق اللي يسمونه غرام أحباب
وطأت رجلي على دربه ولا أدري وش نوى فيني
تبعته لآآآآخر دروبه لين إن القمر قلت غاب
تعب قلبي ولا تعبت مسافات توديني
لقيت الليله الجرداء هدب وضل وسماء وأعشاب
بعد ذاك الظلام اللي يتوهني عناويني
صدفتك معجبه فيني وياليت الغرام إعجاب
و تراك إنتي الهنوف اللي هجيتك تستحقيني
عطيتك عشق من قلبي وسلمت لغلاك رقاب
وغيرك يحترق قلبه ولا يقدر يحاكيني
أنا قبلك صدفت عيون لكن ويش جاب الجاب
ترى كل العيون اللي لقتني ما تكفيني
رماني حظي العاثر عليك وجيتلك طلاب
ولا إنتي عشقتيني ولا إنتي اللي عتقتيني
تعالي وإرحمي ذاك الخفوق المولع المرتاب
ما هو لأجلي علشان الله يجازيك ويجازيني
تعلي في سماء عشقي ولو عشقي خراب أصحاب
وصوني بالهوى نفسك قبل أنك تصونيني
وشيليني على متنك خفوق باري منصاب
ومن فوق الغرام العذب شيليني وحطيني
وما دام أنك هجيتيني شجاع وما يهاب
أنا لك بالهوى والله مثل ما إنتي هجيتيني
أنا ما أمشي ورى غيرك ولو أنه يطق الباب
وترى عيب علي أطعن ولو كثرة سكاكيني
زهود ما يطيق الدم لا دايم ولا طلاب
شجاع وعارف نفسي وأظن انك تعرفيني
غيور ما عرفت أضحك مع الغدر ببرود أعصاب
أبيع عيوني الثنتين قبل إنك تخونيني
وإذا إشتد الغرام اترك خفوق بين ناب وناب
الفرقه تكسر ضلوعي ولا عشق يوطيني
أنا رجال ولي غيره وإذا شفت الهوى كذاب
تثور بقلبي الفزعه ولا تهدى شياطيني
سؤالك لو يزعزعبي كياني ما قبلت عتاب
أجيلك وأسألك نفس السؤال اللي سألتيني
عن العشق القديم أبواب وتجفيبها كثير أبواب
بعد ذاك الحبيب إلي خدعني وإنخدع فيني
أبي عشق تحسبله كل نظرات العيون حساب
وأبي قلب على قلبي وأبي دين على ديني
وأبي كلمة عهد توفي ولا تخلف بدون أسباب
وأبي منك قبل لا أنك تصديني توديني
وأبي درب على العذال صعب ومتعب وغلاب
وأبي نفس الطريق الصعب يبعدهم ويدنيني
ترى لولا القلوب عيون ولدموع العيون هداب
حشا ما تنزل الدمعه لغيرك لو تركتيني
أنا أول من عرف قدرك وأنا توي صغير وشاب
وأبي منك ما دام أنك عرفتيني تحبيني
ما دام أني لقيتك في طريق إسمه غرام أحباب
دخيل الله وبعد الله دخيلك لا تخليني
ما دام كل من يحيى على وجه التراب تراب
عسى تنساني الدنيا ما دام إنتي ذكرتيني

وتقبلوا فائق الاحترام