حثل الكدر

[القالط]

ليش الهواجيس تروينا = من نهر حثل الكدر ماليه
كل ماصفى جو صافينا = عكر قراح النهر صافيه

[عبدالله ناجي]

نهنئكم ماشاء الله تبارك الله " يابو نواف " بأمطار الديمة السكوب والاجواء الساحرة في العاصمة الرياض .


دنيا ولافكرت فينا = وجرحها نحاول نداويه
نجري وهيه تجارينا = تخلط لنا المر مع حاليه

[القالط]

اخى عبدالله الله يبارك فيك الحقيقه الاجواء فى الرياض
شى اقرب للخيال امطار وبراد وخير والحمدلله
اشكرك على ابداعاتك ولك هذه مع التحيه



هل السبب صنع ايدينا = ولا السبب شي مانوحيه
نبقى دواء بس يشفينا = يعالج الحال بللى فيه

[عبدالله ناجي]

الله نسيناه ونسينا = هذا السبب أوله وتاليه
أما الدواء سهل بيدينا = نرجع نخاف الذى نرجيه

[القالط]

كملت واوفيت ياخينا = فالمسأله حكمكم نرويه
واليوم نرجع لماضينا = مايهمنا اللى عنه جافيه