قصيدة علي الريض بناء على طلب استاذنا المعاصر

[الجهني]

أستاذنا المعاصر

أنا وأخوي ضمن كلنا واحد وأنت تامر أمر إنت والأستاذ طه وباءً على طلبكما يسرني نشر القصيدة /

الشاعر الرائع / علي الريض


بعد ماطالني ليل الهجوس وطال بي مسراه = سريت وزان لي نظم القصيد ووزن قيفانه
عساي اكتب كلام مايخيب ظن من يقراه = وعساي اجيب من بحر الشعر لوله ومرجانه
انا العبد الفقير اللي رجاه وعزته بالله = إله مايخيب اللي طلب عفوه وغفرانه
وأنا اللي حده الوقت الردي يالين جاب اقصاه = زمان ماصفط لي غير تعذيبه وحرمانه
وانا الصب العليل اللي طواه البعد لين اشقاه = نسى ظلم الزمان ولانسى تجريح خلانه
اشوف العشق يكبر في الضلوع ولا قدرت اقواه = رعت ذوده مداهيل الخفوق وعشب صمانه
سبايب مترف ماداج في روض الحشا حلياه = ملك تاج المحبة واعتلى عرشه وسلطانه
عليه من البها هيبة شموخ وطلة تزهاه = وعلي من الشقا سقم الجروح وعين سهرانه
اليا منه تبسم شب قنديل الغلا بشفاه = ولا منه تجهم ضاقت الدنيا على شانه
ترك لي في غيابه طعنتين ودمعتين وآه = متى ينهي حضوره سيرة الحرمان واحزانه
له الله لانسى حدب الضلوع ولاذكر مرباه = ولي الله لاذكرته والغلا يرجح بميزانه


الشاعر / علي الريض
===========


فعلاً قصيدة تستاهل وجودها في منتدانا

تقبلوا تحياتي وتقديري
============
الجهــــــــــــــــــــــــني