أبيات رائعه وأبي القصيده تكفوووووون

[إبراهيم المحياوي]

ريحه كما ريح النفل في شعيبه=في وادي علّه من الوسع تعشيب
ممطور من أمس ومبطي ماوطي به=واليوم جاه وفاح طيب على طيب
لاواهني الذيب يرفع قنيبه=وأنا قنيبي بالخفا شقة الجيب


الأبيات السابقه في إعتقادي أنها أبيات رائعه وهي للشاعر الكبير سليمان بن شريم رحمه الله
فأرجو ممن يعتقد بروعتها ويعرف القصيده كامله أن يخبرنا بها حيث أنني تعبت وأن أبحث عنها
وتقبلوا تحياتي

[عاشق حزن]

بسم الله الرحمن الرحيم

الأخ العزيز
( إبراهيم المحياوي )

شاعر المجالس الينبعاويه

تحية طيبه


فعلا الأبيات روعة كما تفضلت ,, بحثت طويلا عن هذه القصيدة حتى وجدتها لك
في أحد المنتديات
وجدت أيضا في منتدى أخر أن هناك عضوا أيضا يبحث عنها , والمصادفه وحدها جمعت بينك وبين هذا العضو الذي يبحث عنها ,, حيث انه اورد نفس الأبيات التي وضعتها أنت ,, وهذا دليل على روعة هذه القصيدة التي نالت إعجاب كل المتذوقين للشعر

V
V
V
وهذه هي القصيدة ( كما وجدتها , وأعتذر إذا كانت هناك أخطاء فأنا أنقلها لك كما وجدتها )



يالله يامجري القمر من مغيبه=يامرجعه للشرق من عقب تغريب
تفرج لعين من وجعها مريبه=عيّا يفيد بها الدوا والتطابيب
هذا لها خامس شهر مستصيبه=بين الرجا والياس والخبث والطيب
على الذي من دونه ارض تعيبه=ما ياصلنّه متعبات المناجيب
ليت الهبوب اللي تجيني تجيبه=لاشرّقت من نجد من غير تجنيب
لين اني اقضب مقدمه والتوى به=عقب التفرّق والبطا والتغاريب
يقرا لمظموني وانا اقرا لغيبه=سراير تكشف بليّا مكاتيب
اللي على فراق شوفه غصيبه=نهار قفّينا على الفطّر الشيب
ادعج غنج كنّه عيون الربيبه=شيهانة تفرس بكل المخاليب
المترف اللي مايماتع صويبه=جرّبت منه وكل شي بتجريب
العين خرسا من طربها غضيبه=فيها لطرّاد المودّه مغاليب
والراس ذيل اشقر يشعشع سبيبه=يسبق اذا جنّ السباياجناديب
والخد قنديل الدجا ينسري به=عليه من شغل النصارى كواليب
وعوده كما البردي ليان رطيبه =يومي به النسناس بين النبانيب
وملامس مانشت منها لبيبه =الين من الديباج دمث المقاضيب
وريحه كما ريح الزهر في شعيبه=في مربع علّه من الوبل تشعيب
ممطور امس ومدرس ماوطيبه=واليوم شمس وفاح طيب على طيب
لاوهني الذيب يرفع قنيبه=وانا قنيبي بالخفا شقًت الجيب
ماوالله اصخي به وانا خاطري به=لو غتّرت سود العوارض من الشيب
يا اهل الهوى سود الليالي صعيبه =ياما سمعن بفراقهم عقب تقريب
خطّ بسجلي مالغيري قريبه=عطف بلطف واجتماع وترحيب
وصلوا على سيد البرايا طبيبه=ماافترّ دولاب الهوى للطواليب

أخيرا أتمنى أني قد وفقت فيما طلبته

كل الود

أخوكم


عاشق حـــزن

[إبراهيم المحياوي]

أخوي عاشق حزن
تسلم يمينك على هذه القصيده الرائعه لسليمان بن شريم رحمه الله
وتستاهل عليها حبة راس يالذيب
ونخدمك بالأفراح
بس ياليت تجيب أسم الموقع عشان إذا فيه قصايد ثانيه نكتبها

[أبو الطيب]

كنت سوف اكتبها لك ولكن سبقنا بالخير أهله

[إبراهيم المحياوي]

تسلم أخوي أبو الطيب وما قصرت