(...) إلى أبو محمد مع التحية !

[صالح محسن الجهني]

مساء الخير يا أبو محمد ... وإليك مع التحية ... والليلة ليلة خميس ... وياليت نأخذ مشوار من الأستمتاع مع حرفكم البهي حفظكم الله .

قريت حرف الغرام وتاه=فكري وأنا بالهوى محتار
سلام صافي لكم صغناه=والعلم في أخر المشوار
ابو محسن

[ناصر الحجوري]

حياك الله اخي ابو محسن
المشوار الذي يكون معك وهو احلى مشوار
ومادام المشوار إبتدى
اليك مع التحية


لحن الغزل والغرام اهواه = يشاجي القلب والسمار
وعندك قبل ما ابتدي تلقاه = ترحيب ضم النسيم وطار

[صالح محسن الجهني]

تسلم يا أمير الحرف
وإليك مع التحية
كل شي يرسي على مبناه=وأنا بنيت الغرام أدوار
واليوم مدري وش اللي جاه=جاي استشيرك قبل ينهار
ابو محسن

[ناصر الحجوري]

الساس يرجع لساس بناه = هودار والاّ ماهو هودار
ولو البنا صاحبه علاه = مخلوق مايضمن الاعمار

[صالح محسن الجهني]

جودت ساسه وصنت فناه= ورفعت سوره لسبع امتار
خايف عليه الخطر والله=وسنجار ماهو مثل سنجار

[ناصر الحجوري]

يامجود الساس لاتخشاه = لو جاه زلزال ما يندار
واللي غزير البحر يسعاه = اسعى معه في بحور غزار

[صالح محسن الجهني]

هذا دواء القلب بعد الآه=يأمير للقيل والشعار
ويحيى عبير الهوى محلاه=لوما القلوب الشقية تغار

[ناصر الحجوري]

ابو محسن الغالي
شكرآ لك على اصطحابك لي معك في هذا
المشوار الادبي الرفيع
واليك المردود الاخير وتصبح على خير


الطيب عندك لقي مرساه = ياعزوتي ياسراج الدار
ياسلالة أهل الكرم والجاه = لك قدر عندي ولك مقدار

[صالح محسن الجهني]

ولكم شكري وتقديري وأحترامي
نحن الذين نهلنا ...من نبعكم الأدبي الكبير
وتعلمنا الكثير
حفظكم الله
وما أجملها من صدفة يا ابو محمد
وعلى الخير والمودة نلتقي
ابو محسن