محاوره ومراسله بيني وبين الشاعر عواد أبورقيبه الجريسي

[عبيدالله أبوزاهره]

هذه المحاوره بيني وبين الشاعر الكبير عواد ابورقيبه الجريسي


ابورقيبه
منحني الليل جلسة أُنس=مع الذي طيبهم راقي
اللي لهم في قرار النفس=صافي من الود فأعماقي
ابوزاهره
قال الذي منتظر من أمس=ليت الوفا بيننا باقي
ومادام صافحتني بالخمس=الأن بارتب أوراقي
ابورقيبه
مردود جاني سواة الشمس=مشرق من الطيب مشراقي
يامن لهذا اللقا محتس=أنا معك وإسمع سياقي
ابوزاهره
يامطرب الحي هيا جِس=وإرفع لنا صوتك الناقي
هات المثل حرِّك المجلس=وإسمع جوابي ومنطاقي
ابورقيبه
عشره سنوات وأنا أدرُس=في المنهج اللي منُه شاقي
لكنه معلم الفهرس=وقّف وسبب لي إرهاقي
ابوزاهره
في مطلب العلم لاتيأس=لاتقول أنا ضاقت أخلاقي
وإن كلّف الأمر عيد الدرس=لو كان في منهج إلحاقي
ابورقيبه
جو الدراسه معي طلمس=وأخلف حساب الذي هاقي
وأصبحت كني سجين بحبس=مُغلق ولايُسمع إنطاقي
ابوزاهره
عزيز ماأرضى عليك المس=صابر على كل ماتلاقي
ماغير بعد إختلاف الطقس=لافاد شارب ولاساقي
وهذه مراسله من الشاعر الكبير عواد ابورقيبه أرسلها عبر الهاتف والرد من اخوكم عبيدالله ابوزاهره
ابورقيبه
مني لأبوزاهره العملاق=سلام ردة عجل ينصاك
عبر الأثير أبعثُه مشتاق=من قلب مِشفق على رؤياك
طال المدى حرّك الأشواق=حِسبة سنه عِد ماشفناك
نبغى إنتطمن على الأرفاق=وإن كان يلزم أمُر جيناك
ابوزاهره
ترحيب من أعمق الأعماق=يامن على البعد ماننساك
أنا أشهد إني غضيب وعاق=إن كان قصّرت مع شرواك
ياذوق ياعِرف ياأخلاق=ياليت لي شِقص من معناك
إنتْ على الطيّبه سبّاق=وفيك الوفا طبع من منشاك