الهلولي مطلوب الان( الأخبار ساخنة)

[ضمن السناني]

العزيز والحبيب/ أبو العنود

شايف اسمك على المتصفح اذا وقت يسمح فالمحاورة ولكن مافيه روحه الليله
الا نكملها

واستلم يالقرم


ياسلام الله سلاماً ياصلك في كل ساعه=والثنا والحمدلله ربنا رب الجلالي
يالهلولي جاتنا الأخبار في بث الاذاعه= لو قنوات الجزيره قالت ان المر حالي

[سعد الهلــــولي]

هلا والله بأبو ريناد
زمان يا ابو عواد عن هالعلوم
استلم لا هنت


مرحبا ترحيب مثل سهيل عالي بارتفاعه =لجل ابن عواد رحبنا ويرخص كل غالي
ظني الاخبار جاتك بين صدق وبين أشاعة = عادة اخبار الجزيره تخلط الواقع خيالي

[ضمن السناني]

ماعلينا فالجزيره لو تحرف فالطباعه=مالها مذهب ومله غير قيل وغير قالي
لكن ان الصدق يوخذ من صناديد الجماعه=بين ابن غانم ذياب وبين ابو زيدالهلالي

[سعد الهلــــولي]

ندري انه علمها مبني على خبث وطماعه = جابوا الاخبار من لندن خبيثين الخصالي
تعرف العلم الصحيح ولكن ما عندك قناعه =جاتكو تمشي بدرب العدل ما فيها ميالي

[ضمن السناني]

استلم يالقرم والظاهر الليلة للصبح


والله اني خابر انك من رجاجيل الشجاعه=ماتخاف وتارد لحوض المنيه ماتبالي
مير وينك يوم(رضوى) بين خوف وبين راعه= مالقيت اسمك مع الأبطالي في سود الليالي

:D


:D

[سعد الهلــــولي]

مشكلتنا مع ولد عواد ما يكب اللكاعه = تدري ان الخوف يمك يمنا المسبار خالي
كل رجل(ن) يا ولد عواد حاميته ذراعه = نحمد الله محتمين حدودنا بأول وتالي

[ضمن السناني]

مالقيتك يوم ذاك الضلع واصلتك سباعه= وماحضرت الموقف الغصاب ياولد الحلالي
كان لبيت المنادي قلت له سمعاً وطاعه=ماتعود يم خيف حسين في وسط المفالي

[سعد الهلــــولي]

لو دعانا الموقف الغصاب جينا باندفاعه = تجي فزعتنا سوات السيل من روس الجبالي
ولو وصلنا مدهم وادرج توالينا كراعه = كان كتفنا كراعه في مواثيق الحبالي

[ضمن السناني]

من يسوم ومن يبيع ومن جلب صنف البضاعه= والجمال اللي عليه الحمل يوم الحمل مالي
نوخوها وسط مكه فالخفا يوم المجاعه= واضحه ياصاحبي ياسعد مافيه جدالي

[سعد الهلــــولي]

اخي ضمن استلم هالمردود وتصبح علىخير ارررررررررررررركد

احمد اللي عزنا ما جات من ربعي قضاعه =المصيبه جابها الي يحمل الفكر المغالي
واكثر الشرهه على اللي يوم سيف الغدر لاعه= سلم العهده لهم من دون حرب ولا قتالي

حصلت بركه ( ونبغي المحاورات دايم كذا على الهواء مباشرة )

[ضمن السناني]

مشكوووووووووووووووووور ياأبو العنود

وفيت وكفيت وبيض الله وجهك

وانتبه ياسنايدي:D:D:D

[صالح التميمي]

الشاعران الكبيران ضمن السناني وسعد الهلولي شهادتي فيكما مجروحة ،ومهما وصلت في الشعر فلن أكون بالنسبة لكما إلا كما نقطة في بحر ،إبداع وبحر من الشعر لايجيده إلا الكبار من أمثالكما ،فبارك الله فيكما وسدد على الخير خطاكما ،ولا حرمنا الله منكما ومن إبداعكما .


مع تحيات أخوكم و محبكم صالح التميمي

[الحازم]

الشاعران الرائعان

سعد الهلولي وضمن السناني

محاوره رائعه جدا

لايجيدها الا الكبار امثالكم كما قال اخوي صالح التميمي

عسى الله ان يديم عليكم الصحه والعافيه

وتقبلوا تحيات اخوكم / الحازم

[ضمن السناني]

أخي الحبيب والصديق الصدوق/ أبو عبيد وأخي الحبيب الصديق/ أبويحيى

شكرا على مروركما العطر وما انا واخي سعد إلا متذوقان للشعر فقط

وننتظر منكما محاورة تجمعكما في المنتدى

ولكما كل الود والتقدير