" ياليتها تاقف الساعة "

[عبدالعزيز الشاطري]

مرّ الظبي شاطي الرايس ومرباعه=ما بين حد النماص اليا مطار ابها
في مركب العشق شدّ احساسها شراعه=بحر الغلا جابها والشوق قاربها
اليا اقبلت في خفا للحب مطواعه=قلبي يرحّب لها والعقل طار بها
ما شفت بين الظبا لو كثرت انواعه=مثله ولا بالحلايا لو تقاربها
مزيون في رسمه ومزيون باطباعه=لا سولف اوتار عود شدّ ضاربها
في خفة اقباله وفي ثقل مرجاعه=فرحه لها سهوم في قلبي مضاربها
على رمال البحر والناس هجّاعه=ونْجوم ليل الهوى تدفع غواربها
كم ليلةٍ مظلمة متوسد ذراعه=ونْجومها تدبر وتقبل كهاربها
والنبق ناضج على اول وقت مطلاعه=والخد بالوان وردٍ من مضاربها
والوجه ناشه صباح الصيف بشعاعه=والشّفّه من الشفق فالبرد .. تاربها
وْاليا ضحك شفت فيها اللول لمّاعه=والسالفه بالشفايف لي تقاربها
واهداب رمشه بحد الشوق قطّاعه=للروس لو انها تفتل شواربها
مكحولة العين فالاجفان مرتاعه=وارتاع قلبي من النظرة وحاربها
منها لها يشتكي لا زادت اوجاعه=وْهي تشتكي منه له تطري عواربها
يا ليتها لالتقينا تاقف الساعه=واليا افترقنا تسابقها عقاربها
النفس في شوفها بالحيل ملتاعه=لوع الظوامي ليا شافت مشاربها
معذور لو قلت قلبي صابته راعه=ادمنت حب الظبي والكاس شاربها
والبعد نار وحطبها الصدر واضلاعه=ياليتني من جماعتها واقاربها

[المعلم]

سلمت ودمت بخير